WE ŨKAKW’A-Ĩ, inyia waku ew’a ata wasyoka kwĩthĩwa thayũ ĩngĩ? We no atane mũno! Ĩndĩ mũndũ ũminĩte kũkw’a nũtonya kwĩthĩwa thayũ ĩngĩ? Ũndũ ũsu waaĩkĩka ĩvinda ya tene?

Kwasisya mũndũ ũũ wĩ vaa, na kĩveti na kamwana kanini. We nĩ mwathani Eliya. Na ũ mũndũ mũka aĩ ndiwa kuma ndũa ya Nzalevathi, na kamwana nĩ kakyo. Mũthenya ũmwe kamwana kau nĩkawaie nginya kakw’a. Na Eliya eea mũndũ mũka ũsu: ‘Nenga kamwana kau.’

Eliya nĩwoosie kana kau kakw’ũ na ambata nako kasũmbanĩ ka ĩũlũ na akakomya. Nake avoya ayasya: ‘Ame Yeova, eka kamwana kaa kethĩwe thayũ ĩngĩ.’ Na kamwana kau kambĩĩa kũveva! Eliya nĩwakosie na atheea nako na eea mũndũ mũka ũsu: ‘Sisya mwana waku e thayũ!’ Kĩu nĩkyo kĩtumi inyia wĩ na ũtanu mwingĩ.

Mwathani ũngĩ wa vata wa Yeova eetawa Elisa. Aĩ mũtetheesya wa Eliya. Ĩndĩ ĩtina wa ĩvinda ĩna Yeova nĩwamũtũmĩie kwĩka syama. Mũthenya ũmwe Elisa nĩwaendie ndũanĩ ya Sunemu, nakw’o kwaĩ mũndũ mũka wamũthokisye nesa mũno. Ĩtina mũndũ mũka ũsu nĩwasyaie kavĩsĩ.

Kĩoko kĩmwe, ĩtina wa kana kau kwĩana, ko nĩkaumaalile kathi mũũndanĩ vala ĩthe watethasya wĩa. O mĩtũkĩ kamwana kau kakaya: ‘Mũtwe wakwa!’ Na kamina kwĩnũkw’a, kakw’a. Inyia wako aĩ na kĩũũyũ mũno! Na vate kweteela athi na eeta Elisa.

Yĩla Elisa wavikie, alika nyũmba vamwe na kana kau kakw’ũ. Na avoya Yeova, na akoma etambũũkĩtye ĩũlũ wa kimba kyako. O mĩtũkĩ mwĩĩ wako wakwata muutĩa, nako kaathimũa mavinda mũonza. Inyia wako atanie ta kĩ yĩla walikile nthĩnĩ na eethĩa kamwana kake ke thayũ!

Andũ aingĩ mũno nĩmakw’ĩte. Na ũndũ ũsu nũtumaa andũ moo na anyanyae mew’a kyeva mũno. Ĩthyĩ tũi na ũtonyi wa kũthayũũkya akw’ũ. Ĩndĩ Yeova e na w’o. Ĩtina tũkeemanyĩsya ũndũ wĩthayũũkya milioni mbingĩ sya andũ.

1 Asumbĩ 17:8-24; 2 Asumbĩ 4:8-37.