WI TKAMQ raj junaq chʼinaʼal, kʼaru tixye li xnaʼ wi twakliiq raj wiʼ chik chi yoʼyo? Kʼajoʼ raj tsahoʼq saʼ xchʼool chi rilbʼal! Abʼan, ma aawabʼihom naq xwakliik wiʼ chik chi yoʼyo junaq kamenaq?

Saʼ li eetalil wank jun li winq, wank jun li ixq ut jun li chʼinaʼal. Li winq aʼan laj Elias ut aj kʼanjel chiru li Yos. Li ixq aʼin kiyoʼlaak saʼ li tenamit Sarepta ut malkaʼan. Ut li chʼinaʼal aʼan li xyum li malkaʼan. Abʼan saʼ jun kutan li chʼinaʼal kinimank xyajel ut kikamk. Naq kikamk li chʼinaʼal laj Elias kixye re li malkaʼan: ‹Kʼe we laayum›.

Laj Elias kixkʼam li chʼinaʼal saʼ xkabʼ tasal li ochoch ut kixkʼe saʼ chʼaat. Ut kixye re li Jehobʼa: ‹At Jehobʼa bʼaanu usilal waklesi wiʼ chik chi yoʼyo li chʼinaʼal aʼin›. Tojaʼ naq kikʼulunk xchʼool li chʼinaʼal! Chirix chik aʼan laj Elias kikubʼeek chaq rikʼin li chʼinaʼal ut kixye re li malkaʼan: ‹Laayum yoʼyo›. Li malkaʼan kisahoʼk saʼ xchʼool naq kiril ru li xyum.

Laj Eliseo aʼan jun chik laj kʼanjel chiru li Jehobʼa. Laj Eliseo natenqʼank re laj Elias. Li Jehobʼa kixkʼe xwankil laj Eliseo re naq tixbʼaanu ajwiʼ li sachbʼachʼoolej. Naq laj Eliseo kiwulak saʼ li tenamit Sunem kixtaw jun li qanaʼchin jwal chaabʼil rikʼin. Chirix chik aʼan li qanaʼchin aʼin ut li xbʼeelom keʼwank jun li xyum.

Ma nakaanaw kʼaru kixkʼul li chʼinaʼal naq ak nim chik? Saʼ jun eqʼla li chʼinaʼal xko xtawbʼal li xyuwaʼ saʼ li xkʼanjel. Tojaʼ naq kiʼok xyeebʼal: ‹Kʼajoʼ xrahil linjolom!› Naq li chʼinaʼal kiwulak saʼ rochoch, kikamk. Kirahoʼk saʼ xchʼool li xnaʼ, joʼkan naq xko saʼ junpaat chi xsikʼbʼal laj Eliseo.

Laj Eliseo kiwulak saʼ rochoch li qanaʼchin ut kixkʼam li chʼinaʼal saʼ xchʼaat, kitijok ut kiyoklaak saʼ xbʼeen. Tojaʼ naq kiʼok chi luhaak xtibʼel li chʼinaʼal ut wuqubʼ sut kiʼatʼisamak. Naq li naʼbʼej kiril naq li xyum kiʼajk ru, kisahoʼk saʼ xchʼool!

Naq nekeʼkamk li qakomon ut ebʼ li qamiiw narahoʼk saʼ qachʼool. Abʼan laaʼo inkʼaʼ nokooru xwaklesinkilebʼ chi yoʼyo. Kaʼajwiʼ li Jehobʼa naru xwaklesinkilebʼ li kamenaq. Toj tqatzol chanru tixbʼaanu aʼin.