YINDULA ntete kana nge fwa. Mama na nge tavanda nki mutindu kana nge yantika na kufulumuna dyaka? Yandi tavanda na kyese mingi! Kansi, keti muntu ya kufwa lenda futumuka? Keti yau mesalamaka dezia?

Bakala ya beno kemona na kifwanisu kele mbikudi Elie; nkento yai meyamba mwana na yandi kele mufwidi ya mbanza Zarefat. Tala mutindu mambu lutaka: kilumbu mosi, mwana ya mufwidi yai belaka. Maladi kotilaka yandi ngolo mpi yandi fwaka. Ebuna Elie tubaka na mama na yandi nde: ‘Pesa mono mwana na nge.’

Elie nataka mwana na suku yina yandi vandaka kulala mpi tulaka yandi na mbeto. Na nima yandi sambaka nde: ‘O Jéhovah, vutula moyo ya mwana yai.’ Mwana yantikaka na kuzinga dyaka! Ebuna Elie tubaka nde: ‘Mwana na nge kezinga!’ Mansanga ya kyese basikaka mama.

Mbikudi yankaka ya nene vandaka Eliza. Yandi vandaka nsadisi ya Elie, mpi yandi vandaka na kiyeka ya kusala bidimbu ya nkumbwa. Kilumbu mosi, Eliza kwendaka na Sumen, mbanza yina vandaka kuzinga nkento mosi ya vandaka kuyamba yandi mbote. Na nima, nkento yina butaka mwana ya bakala.

Mwana yina yelaka, mpi kilumbu mosi, yandi kwendaka kutala tata na yandi yina vandaka kusala na bilanga. Na mbala mosi, mwana yina yantikaka na kuwa mpasi ya ngolo na ntu. Bau nataka yandi na nzo mpi yandi fwaka. Ebuna, nkento kwendaka nswalu kusosa mbikudi Eliza.

Ntangu Eliza kumaka, yandi kwendaka na suku ya bau tulaka mvumbi ya mwana. Yandi sambilaka Jéhovah mpi lalaka na zulu ya mwana; nitu ya mwana kumaka tiya. Na nima, mwana kosulaka mbala nsambwadi mpi yandi telamaka. Yindula kyese yina mama na yandi vandaka na yau sambu mwana na yandi futumukaka!

Bantu mingi mefwaka. Ya kyeleka, mabuta na bau na banduku na bau kele na mawa. Beto kele ve na kiyeka ya kufutumuna bafwa. Kansi Jéhovah kele na kiyeka ya kufutumuna. Beto tamona nki mpila Nzambi tafutumuna mafunda ya bantu yina mefwaka.