UMVWE waji wafwile, bainobe bakonsha kumvwa byepi inge wasangulwa? Bakonsha kusangalala bingi! Nanchi muntu wafwa, wakonsha kwikala mumi jibiji nyi? Abya kyaubiwapo kala nyi?

Akimona iwe mwanamulume, mwanamukazhi ne kalombwana. Awe mwanamulume ke ngauzhi Elaija. Mwanamukazhi wafwilwa waikalanga ku muzhi wa Zalefwata kabiji awe kalombwana ke mwananji. Juba jimo, kalombwana wakolelwe. Kikola kyanji kyaswezhezhe bingi ne kufwa wafwile. Elaija waambijile mwanamukazhi amba: “Muletai mwanenu.”

Elaija watwajile mwana wafwile pa nzubo ya peulu ne kumulajika pa mwanya. Ponkapo, walombele’mba: ‘Anweba Yehoba, lekai uno mwana ekale na bumi jibiji.’ Kabiji ponkapo mwana wasangukile! Elaija wamushikwile ne kumwikizha panshi kabiji waambijile mwanamukazhi amba: ‘Talai, mwanenu ke mumi!’ Kino kyo kyalengejile inanji kusangalala bingi.

Ngauzhi mukwabo wa Yehoba wanemene bingi wajinga Elisha. Wajinga nkwasho wa kwa Elaija. Bino pa bimye bimo Yehoba waingijishanga ne Elisha kuba bya kukumya. Juba jimo, Elisha wayile mu muzhi wa Shunema ko ataine mwanamukazhi wamubijile bibusa. Pa kupitapo moba, uno mwanamukazhi wasemene mwana wa mulume.

Mwana byo akomene, juba jimo lukelo wayile kwajinga bashanji ko baingijilenga mu bujimi. Ponkapotu, mwana watamine’mba: “Nafwa mutwe!” Byo bamutwajile ku nzubo, mwana wafwile. Inanji waubile bingi bulanda! Wayile bukiji bukiji na kumuleta Elisha.

Elisha byo afikile, watwelele mu nzubo mwajinga mwana wafwa. Walombele kwi Yehoba ne kukuvumana pa mwana. Ponkapotu, mubiji wa mwana watwile kyuya, kabiji wachamwine jitanu na jibiji. Inanji byo aishile mu nzubo ne kutana’mba mwananji mumi, wasangalele bingi!

Bantu bafwa bavula bingi. Kino kyalengela bisemi byabo ne balunda nabo kwikala bingi na bulanda. Kechi tuji na bulume bwa kusangula bafu ne. Bino Yehoba aye uji na bulume. Kulutwe, tukafunda byo akasangula bantu bavula bingi.