ပူ ၆၈
ပိာ်ခွါဖိသၣ်ခံဂၤ လၢအမူထီၣ်က့ၤ အဂ့ၢ်
သုမ့ၢ်သံဝံၤဒီး သုမ့ၢ်ဂဲၤဆၢထၢၣ်သမူထီၣ်က့ၤသၢပျၢၤ သုဆိကမိၣ်လၢ တၢ်ကမၤအသးဒီး သုမိမိၢ်တဖၣ်ဒ်လဲၣ်. အသးကခုဝဲဒိၣ်မးန့ၣ်လီၤသၢၣ်. ဘၣ်ဆၣ် ပှၤလၢအသံတ့ၢ်တဂၤန့ၣ် မူထီၣ်က့ၤဝဲကသ့ဧါ. လၢညါန့ၣ် တၢ်ကဲထီၣ်တ့ၢ်အသးဒ်န့ၣ်ဧါ.
ကွၢ်ပှၤသးပှၢ်, ပှၤပိာ်မုၣ်, ဒီးပိာ်ခွါဖိလၢတၢ်ဂီၤအပူၤအံၤတက့ၢ်. ပှၤပိာ်ခွါသးပှၢ်မ့ၢ် ဝံအ့ၤလံယၤလီၤ. ပှၤပိာ်မုၣ်တခီမ့ၢ် မုၣ်ကမဲလၢဝ့ၢ်စၤရဖၤသး ဒီး ဖိသၣ်မ့ၢ်အဖိခွါလီၤ. ဘၣ်မုၢ်တနံၤန့ၣ် ဖိသၣ်အံၤ ဆါထီၣ်ဝဲလီၤ. အတၢ်ဆါန့ၣ် နးထီၣ်နးထီၣ်ဒီး လၢခံန့ၣ် သံဘၣ်အသးလီၤ. ဖဲအကတီၢ်န့ၣ် ဝံအ့ၤလံယၤစံးဘၣ်ပိာ်မုၣ်လၢ ‘ဟ့ၣ်ယၤဖိသၣ်တက့ၢ်’ န့ၣ်လီၤ.
အ့ၤလံယၤစိာ်ထီၣ် ဖိသၣ်ဆူဟံၣ်အဖီခိၣ် တကထၢဝံၤ ပာ်ထီၣ်ဝဲဒၣ်လၢလီၢ်မံခးဖီခိၣ်လီၤ. ဃ့ဘါထုကဖၣ်တၢ်ဒီးစံးဝဲဒၣ်, ‘အိယဟိဝၤဧၢ, မၤစၢၤဒ်သိးဖိသၣ်ကမူထီၣ်က့ၤတက့ၢ်’ န့ၣ်လီၤ. တုၤနုၤတစု, ဖိသၣ်န့ၣ် မူထီၣ်က့ၤဝဲဒၣ်လီၤ. ထဲန့ၣ်ဒီး အ့ၤလံယၤ ကိးလီၤဖိသၣ်ဆူဟံၣ်ဖီလာ် တကထၢန့ၣ်လီၤ. ဒီးတဲဘၣ်ပိာ်မုၣ်န့ၣ်လၢ ‘လၢအံၤ, နဖိမူထီၣ်က့ၤလံ’ န့ၣ်လီၤ. လၢတၢ်န့ၣ်အဃိ အမိၢ်သးခုလၢာ်သးန့ၣ်လီၤသၢၣ်.
ယဟိဝၤအဝံလၢအကါဒိၣ် လၢခံတဂၤမ့ၢ်ဝဲဒၣ် အလံၤၡါန့ၣ်လီၤ. အဝဲဒၣ်မ့ၢ်အ့ၤလံယၤ အစုတီၤတဂၤလီၤ. ဘၣ်ဆၣ်သနာ်က့ ဖဲအဆၢကတီၢ်တုၤအခါ ယဟိဝၤသူအီၤလၢ အကပာ်ဖျါထီၣ် တၢ်လီၤလးအကလုာ်ကလုာ်န့ၣ်လီၤ. ဘၣ်မုၢ်တနံၤ အလံၤၡါလဲၤဝဲဆူဝ့ၢ်ၡူန့ၣ်အခါ ထံၣ်လိာ်အသးဒီး ပိာ်မုၣ်လၢအတူၢ်လိာ်အီၤ ဂ့ၤဂ့ၤဘၣ်ဘၣ်တဂၤန့ၣ်လီၤ. လၢခံန့ၣ် ပိာ်မုၣ်အံၤမၤန့ၢ်ဝဲဒၣ် အဖိပိာ်ခွါဖိတဂၤလီၤ.
ဖိသၣ်အံၤ ဒိၣ်ထီၣ်ဝဲဖးဒိၣ်ဖိလံအလီၢ်ခံ ဘၣ်မုၢ်တဂီၤန့ၣ် လဲၤဝဲဒၣ်ဆူအပၢ်လၢအထူစံာ် အအိၣ်န့ၣ်လီၤ. ဖိသၣ်န့ၣ် ကိးထီၣ်ဝဲ ‘ယခိၣ်ဆါ’ သတူၢ်ကလာ်အဃိ ဘၣ်တၢ်ဟဲက့ၤကိးအီၤဆူဟံၣ်ဝံၤ သံဝဲဒၣ်န့ၣ်လီၤ. အမိၢ်အသးကအုးဝဲဒၣ်ဒိၣ်မးန့ၣ်လီၤသၢၣ်. ဒီးတဘျီဃီန့ၣ် လဲၤကိးဝဲအလံၤၡါန့ၣ်လီၤ.
ဖဲအလံၤၡါဟဲတုၤဝဲအခါ လဲၤနုာ်ဝဲဆူဒၢးပူၤလၢဖိသၣ်သံန့ၣ်လီၤ. ဃ့ဘါထုကဖၣ်ဆူ ယဟိဝၤအအိၣ်ဝံၤ မံလီၤဝဲလၢပိာ်ခွါဖိသၣ်အလိၤန့ၣ်လီၤ. တယံာ်ဘၣ်ဒီး ဖိသၣ်အနီၢ်ခိ လၢၤထီၣ်က့ၤဝဲန့ၣ်လီၤ. ဝံၤဒီးဖိသၣ်န့ၣ် ဆဲထီၣ်ဝဲနွံဘျီန့ၣ်လီၤ. ဖဲအမိၢ်ဟဲနုာ်လီၤဆူဒၢးပူၤအခါ ဖဲအထံၣ်အဖိမူထီၣ်က့ၤဝဲဒီး ကသးခုဝဲဆံးဒိၣ်လဲၣ်န့ၣ်လီၤ.
ပှၤသံတ့ၢ်လံဂီၢ်မုၢ်ဂီၢ်ပၤလံန့ၣ်လီၤ. အဝဲသ့ၣ်အဘူးအတံၢ် ဒီးအတံၤသကိးတဖၣ်စ့ၢ်ကီး ဘၣ်သးအုးတ့ၢ်ဒိၣ်မးလံန့ၣ်လီၤ. ပတအိၣ်ဒီး တၢ်စိကမီၤလၢ ပကမၤမူထီၣ်က့ၤပှၤသံန့ၣ်ဘၣ်. ဘၣ်ဆၣ်သနာ်က့ ယဟိဝၤအိၣ်ဒီးတၢ်စိတၢ်ကမီၤအံၤန့ၣ်လီၤ. လၢခံန့ၣ် ပကသ့ၣ်ညါဘၣ် ကစၢ်ကမၤမူထီၣ်က့ၤ ပှၤလၢအကကွဲၢ်တဖၣ်အကကွဲၢ်ဒ်လဲၣ် အဂ့ၢ်န့ၣ်လီၤ.
