NSENE ove o fa, ngapi omu nava lizuvha onyoko nsene o tengwira hena keparu? Tava hafa unene! Nye kuvhura muntu ogu ana fu a paruke hena ndi? Ya horoka rumwe ndi?

Tara mugara ogu ana kara apa, nomukadi ntani nomumatigona. Mugara kuna kara muporofete Eliya. Mukadi kuna kara mufisayendi gomositata saSarefata, ano mumati kuna kara munwendi. Ezuva limwe mumati ta vere. Ta vere unene dogoro ta fu. Eliya ta tantere ogo mukadi asi: ‘Pe nge mumati ogo.’

Eliya ta twara munona gokufa monzugo zekeguru nokumurangeka pouro. Makura ta kanderere asi: ‘Jehova, ninka mumati ogu a paruke hena.’ Mumati makura ta tameke kuhesera! Eliya makura ta mu gusa nokumugurumwisa, makura ta tantere mukadi asi: ‘Tara, munoge muzuni!’ Eyi yiyo vana hafere ozina unene.

Muporofete gwaJehova gumwe hena gomulyo gedina Elisa. Age mukwafi gwaEliya. Nye konyima zosiruwo, Jehova ta ruganesa Elisa nage a rugane yitetu. Ezuva limwe Elisa ta zi kositata saSunemu, oku mukadi gumwe nga ka mu tekura nawa. Konyima mukadi ogu ta reta mukeke gomumati.

Ngurangura zimwe, apa mumati ana kuru, ta zi a ka rugane noguhwe mepya. Haruka tupu, mumati ta takuma asi: ‘Mutwe gwange kuna kukora!’ Apa vana mu twara kembo, mumati ta ka fa. Ee, eguwo musi vana kara nalyo ozina! Poopo tava zi va ka zigide Elisa.

Elisa apa ana ya siki, ta zi monzugo nomunona gokufa. Ta kanderere Jehova, nokuwombomana peguru lyorutu romunona. Poopo tupu rutu romumati taru tameke kugenya, makura ta wetjimwisa rutano-naruvali. Ee, ozina koruhafo apa vana kuhwilira nokumona munwawo muzuni!

Vantu wovanzi kwa fa. Eyi kwa guvisa vanekoro novakaume vawo unene. Ose kapi twa kara nononkondo dokupindura vafe. Nye Jehova ga kara nado. Konyima ngatu lironga asi ngapi omu nga ka tengwidira mamiliyona gomanzi govantu keparu.

1 Vahompa 17:8-24; 2 Vahompa 4:8-37.