NGA umo muana a tsa kaha a sanguka, vati va naye vevua ku mutima? Va viukilila cikuma! Vuno nga muntu a tsa a hasa ku yoya lueka ni? Vuno viuma via cifua eci via lingikileho ni?

Tala ou yala nou mpuevo kaha nou kanike va li aha. Ou yala ikeye kapolofeto Eliya. Uze mpuevo ua pua ntulue ua ku mbonge ya Zalefate, kaha ou kanike ua yala muaneni. Tangua limo ou kanike ua vavalele. Kaha vuvezi vueni vua hianene cikuma ngeci ua tsile. Kaha Eliya ua lekele ou mpuevo ngueni: ‘Neha kuno ou kanike’.

Kaha Eliya ua tambuile civimbi ca kanike ua londa neni mu hondo ya kuilu ua ka mu langeka ha muhela. Kaha ua vundilile ngueni: ‘A Yehova, lingisa ou kanike a yoye naua’. Kaha kanike ua putukile ku huima! Kaha Eliya ua sulukile na kanike na ku leka mpuevo ngueni: ‘Tala muanove a yoya!’ Ngeci mukemuo u mona naye na viukilila cikuma.

Kuli naua kapolofeto ua Yehova lizina lieni Elisa. Ua puile mukuasi ua Eliya. Vunoni mu nima ya ntsimbu, Yehova ua pangesele Elisa mu ku linga vikomoueso. Tangua limo, Eliya ua ile ku mbonge ya Suneme, ua uaneneko umo mpuevo na mu tambuile mua cili cikuma. Kaha ku lutue lua ntsimbu ou mpuevo ua kuatele kakeke ua yala.

Tangua limo, ku cimene, kanike ua ile ku mehia mu ku ka panga hamo na ise. Kaha kanike ua putuka ku teta ngueni: ‘Nani mutue uange!’ Omo mu va mu tualele ku ndzivo, ua ka tsa. Naye ua vuile vusiua vua kama! Kaha haze vene ua ile mu ku ka sana Elisa.

Elisa mua ku hetele, ua londa na civimbi ca kanike ku hondo ya kuilu na ku ka ci langeka ha muhela. Ua putuka ku vundila kuli Yehova kaha ua lioluele ha kanike. Ngeci muvila ua kanike ua putukile ku tuima kaha ua tsehuile lutanu na luvali. Naye ua vuile ndzolela ya kama ku mona muaneni a yoya lueka naua!

Vantu va vengi vengi va tsa. Eci ca neha vusiua vua kama cikuma ku va vusoko na va vusamba vavo. Ka tuesi na ngolo ya ku sangula vatsi. Vunoni Yehova a li nayo. Ku lutue tu ka lilongesa vati Yehova tangua aka sangula makulukazi a makulukazi a vantu va tsa.