Ekitebyo 68

Aboojo Babiri Abaahimbuukire

KU WAAKUBA waafiire, nyoko akaahurira ata ku waakuhimburwa? Akaashemererwa munonga! Kwonka omuntu owafiire akaashuba abaho? Eki kyarabaireho?

Reeba ogwo mushaija, n’omukazi hamwe n’ogwo mwojo muto. Omushaija n’omurangi Eliya. Ogwo mukazi n’omufaakazi w’omu rurembo rwa Zarefaasi, kandi omwojo n’omutabani. Mbwenu eizooba rimwe, omwojo ogwo akarwara. Yaayeyongyera kuba kubi okuhitsya obu yaafiire. Eliya reero yaagambira omukazi ati: ‘Mpa omwojo ogwe.’

Eliya yaatwara ogwo mwana ofiire ahaiguru omuri kaanyinaibiri yaamubyamya aha kitanda. Bwanyima yaashaba ati: ‘Ai Yehova, garura omwojo ogu abe ohuriire.’ Atyo omwojo atandika kwitsya! Aho Eliya amushumya ahansi reero agambira omukazi ati: ‘Reeba, omwana waawe ahuriire!’ Egi niyo nshonga ahabwaki omukazi ashemereirwe munonga.

Ondiijo murangi mukuru wa Yehova naayetwa Elisa. Naakora nk’omuhwezi wa Eliya. Kwonka bwanyima Yehova akeejunisa Elisa kukora eby’okutangaaza. Eizooba rimwe Elisa aza omu rurembo Shuneemu, ahi omukazi yaamubereire ow’embabazi. Bwanyima ogu mukazi azaara omwana w’omwojo.

Rimwe omu kasheeshe, omwojo yaaherize kukura, aza kushanga ishe ei yaabaire naakora omu musiri. Ahonaaho omwojo ataka ati: ‘Omutwe gwanyita!’ Bwanyima y’okumutwara omuka, omwojo afa. Nyina ka yaashaashire munonga! Ahonaaho agyenda areeta Elisa.

Elisa ku ahika aho, aza omu kishengye ei omwojo ofiire yaabaire ari. Ashaba Yehova, kandi ayegororera aha mubiri gw’omwana. Hatakahweireho kaanya omubiri gw’omwojo gutagata, kandi ayetsyamura emirundi mushanju. Mbwenu omukazi ka yaashemereirwe ku yaatahiremu akashanga omwojo we ahuriire!

Abantu baingi munonga bafiire. Eki kireetaire amaka gaabo n’abanywani baabo obusaasi bwingi. Titwine maani g’okuhimbuura abafu. Kwonka Yehova naabaasa. Bwanyima niitwija kwega oku arigarura enkumi n’enkumi z’abantu kuba abahuriire.

1 Abagabe 17:8-24; 2 Abagabe 4:8-37.