CHIʼ kkam jun akʼal, ¿su kubʼan runan chiʼ kkʼastaj loq? ¡Ri unan sibʼalaj kkikotik! Tekʼuriʼ ¿la kkʼastaj na jun winaq chiʼ kamnäq chik? ¿La xbʼan wariʼ ojer?

Chawilaʼ pa wachbʼäl wajun achi riʼ, xuqujeʼ jun ixoq rukʼ alaj akʼal. Wajun achi riʼ are ajqʼaxal utzij ri Ajawaxel ubʼiʼ Elías. Ri ixoq are jun malkaʼn rech ri tinamit Sarepta, ri laj akʼal are ral wajun ixoq riʼ. Tekʼuriʼ, xopan jun qʼij wa akʼal riʼ xuriq yabʼil. Xuqujeʼ sibʼalaj kʼäx kʼolik, tekʼuriʼ xkamik. Rumal waʼ Elías xubʼij che ri ixoq: ‹Chaya ri akʼal chwe›.

Elías xukʼam bʼi ri akʼal kamnäq xuya puwiʼ ri chʼat. Tekʼuriʼ xubʼan jun uchʼawem: ‹Oh Jehová, chabʼana che ri akʼal che kkʼastaj loq›, xchaʼ. ¡Ri akʼal xkʼastajik! Ri Elías xukʼam bʼi che ri ixoq: tekʼuriʼ xubʼij ‹¡Chawilampeʼ ri awal kʼaslik!› Xchaʼ che, wariʼ sibʼalaj xubʼano che xkikotik ri ixoq.

Jun chik ajqʼaxal utzij Jehová are Eliseo. Areʼ kuto ri Elías. Tekʼuriʼ qʼaxnäq chi kebʼ oxibʼ junabʼ Jehová xubʼan che ri Eliseo xeʼukunaj winaq. Jun qʼij Eliseo xbʼe pa tinamit Sunem, chilaʼ kʼo jun ixoq che xubʼan sibʼalaj utz rukʼ. Tekʼuriʼ xqʼax kebʼ oxibʼ qʼij wajun ixoq riʼ xkʼejeʼ jun ral.

Pa jun qʼij, chiʼ ri akʼal nim chik, xbʼe rukʼ ri utat pa chak. Tekʼuriʼ ri akʼal xubʼij wariʼ: ‹¡Kʼäx nujolom!› Xchaʼ, chiʼ xkʼam bʼi pa rachoch xkamik. ¡Ri unan sibʼalal xbʼisonik! Rumal laʼ chanim xutzukuj ri Eliseo.

Chiʼ xopan ri Eliseo, xok bʼik pa rachoch ri akʼal che kamnäq chik. Xubʼan uchʼawem che Jehová, xuqujeʼ xqʼoyik, o xkatzʼeʼ, puwiʼ ri akʼal. Naj täj ri akʼal xmiqʼik, tekʼuriʼ xubʼan utʼixnabʼ wuqubʼ mul. ¡Sibʼalaj xkikot ri unan chiʼ xrilo che kʼaslik!

Sibʼalaj kʼi winaq e kamnäq. Wariʼ sibʼalaj kubʼan chike täq kifamilias xuqujeʼ kachiʼl che sibʼalaj kebʼisonik. Öj kojkun täj che kqabʼan chike ri e kamnäq che kewalij loq. Xaq xiw Jehová kkunik. Che jun chik bʼantajik kqilo che Jehová kkunik kuwalsaj kʼi täq kamnäq xuqujeʼ kubʼan na chike che kekʼaseʼ chi na jumul chik konojel.