¿IMAYNATAQ mamaykiqa sientekunman wañukuspayki kaqllamanta kawsariramuptikiqa? ¡Maynataraqchá kusikunman! ¿Yaqachu wañukuqqa kawsariramunman? ¿Ñawpaqpiqa pillapas kawsarirqachu?

Dibujopi qaway chay runata hinaspa warmiwan warmachatapas. Chay runaqa willakuq Eliasmi. Warmiqa Sarepta llaqtayoq viuda warmim, warmachañataqmi paypa wawan. Huk punchawmi warmachaqa llumpayta onqoruspa wañururqa. Hinaptinmi Eliasqa warmita nirqa: ‘Apamuy wawaykita’ nispa.

Hinaptinmi Eliasqa altospi samasqan cuartoman wañusqa wawata aparurqa hinaspa camaman churaykuspa Diosta mañakurqa kaynata: ‘Jehová Dioslláy, ruegakuykim kay wawapa vidanta kasqallan kutiykachinaykipaq’ nispa. ¡Hinaptinmi warmachaqa kawsariramurqa! Chaymi Eliasqa altospi cuartomanta uraykachispa warmiman nirqa: ‘¡Kayqaya wawaykiqa kawsarirun!’ nispa. Chaymi mamanqa kusirikurqa.

Chaymantapas Jehová Diospa willakuqnin Eliseo sutiyoq runapas karqa. Payqa willakuq Eliaspa yanapaqninmi karqa. Ichaqa tiempopa risqanman hina Eliseotapas Jehová Diosqa yanaparqa milagrokunata rurananpaq. Chaymanta Eliseoqa Sunem sutiyoq llaqtata rirqa, chaypim paytaqa kuyakuywan huk warmi atiendeykurqa. Chaymanta hina chay warmillataqmi huk wawata wachakururqa.

Chaymanta wawa wiñaruspanmi huk punchaw rirqa taytanman chakrapi llamkachkaptin. Hinaspam qonqayllamanta qaparirqa: ‘¡Ay umallaymi nanawachkan!’ nispa. Hinaptinmi wasinman aparuptinku, chaypi wañururqa. ¡Pobrella maynatach mamanqa llakikurqa! Chayllam willakuq Eliseota maskaq pasarqa.

Chaymi Eliseoqa warmipa wasinman chayaruspan warmapa kasqan cuartoman yaykurqa hinaspa Jehová Diosta mañakuruspa wañusqa warmapa hawanpi pakchanpa chutakuykurqa. Chayllam warmapa cuerpon qoniriyta qallaykurqa hinaspa qanchis kutikama hachinyarurqa. ¡Maynataraqchá mamanqa kusirikurqa wawan kawsariramusqanta qawaykuspan!

Achka runakunañam wañurunku. Chaymi ayllunkunapas chaynataq amigonkunapas llakikunku. Manam ñoqanchikqa atichwanchu wañusqakunata kawsarichiytaqa. Jehová Diosllam chaytaqa ruranman. Chaymantañam qawasunchik wara-waranqantin runakunata Jehová Dios kawsarichimunanmanta.