ME MATE koe, eaa te manako o toou mama me akaora akaouia mai koe? Ka rekareka maata aia! Tera ra ka ora akaou ainei tetai tangata tei mate? Kua tupu ana ainei teia i mua ana?

Akara ana i teia tangata, e te vaine ma te tamaiti meangiti. Ko te peroveta teia ko Elia. E vaine takaua teia no te oire o Zarephata, e nana teia tamaiti. I na, tetai ra kua maki teia tamaiti. Kua kino roa atu tona maki e i te openga kua mate aia. Akakite i reira a Elia ki te vaine e: ‘Omai ra i te tamaiti kiaku.’

Kua apai a Elia i te tamaiti mate ki te pia i runga e kua tuku iaia ki runga i te roi. I reira kua pure aia e: ‘E Iehova e, akaora akaou mai ana koe i teia tamaiti.’ E kua akamata te tamaiti i te akaea! I reira kua apai atu a Elia i te tamaiti ki te taua i raro e kua karanga atu ki te vaine e: ‘Akara ana ra, kua ora akaou to tamaiti!’ No reira teia mama i rekareka ai.

Tetai atu peroveta puapinga a Iehova ko Elisaia. Kua tavini aia ei tauturu no Elia. I te tuatau ra i aereia, kua taangaanga katoa a Iehova ia Elisaia kia rave i te au temeio. Tetai ra kua aere a Elisaia ki te oire ko Sunema, te ngai i takinga meitaki ei tetai vaine iaia. Muri mai kua anau teia vaine i tetai pepe tamaroa.

Tetai popongi, muri ake i te maata mai anga te tamaiti, kua aere aia i te angaanga e tona papa i roto i te kainga. Poitirere ua ake kua aue mai te tamaiti e: ‘Mamae toku mimiti!’ Muri ake i tona apaiia anga ki te kainga, kua mate te tamaiti. Taitaia tikai tona mama! I te reira taime rai kua aere aia i te tiki ia Elisaia.

Tae anga mai a Elisaia, kua aere atu aia ki roto i te pia o te tamaiti mate. Kua pure aia kia Iehova, e kua takoto ki runga ake i te kopapa o te tamaiti. Kare i roa ana kua maana te kopapa o te tamaiti, e kua maretie mai e itu taime. Rekareka tikai tona mama i tona aere anga mai e te kite anga e kua ora akaou tana tamaiti!

Maata ua atu rai te au tangata i mate. Kua riro teia ei akataitaia i to ratou au pamiri e te au oa. Kare o tatou mana i te akaora i tei mate. E mana ra to Iehova. A muri mai, ka kite tatou e akapeea aia me akaora akaou mai e mirioni ua atu tangata.