68-нҗи хекая

Ики огланың дирелиши

АЙДАЛЫ, сен өлйәң, соңам дирелйәң. Сениң пикириңче, эҗең өзүни нәхили дуярды? Онуң шатлыгының чәги болмаса герек! Йөне өлен адам дирелйәрми нәме? Озал өлен адам хей дирелипмиди?

Суратда бир адамы, аялы ве огланҗыгы гөрйәнсиң. Бу адам Ыляс пыгамбер. Бу аял Сарепталы дул аял, огланҗык болса онуң оглы. Бир сапар огланҗык кеселләп, гүн-гүнден кесели агырлашып өлйәр. Шонда Ыляс огланҗыгың эҗесине: «Огланҗыгы маңа бер» диййәр.

Ыляс оны ёкаркы отага әкидип, дүшегинде ятыряр. Соңра: «Ехова, бу огланҗыгы дирелт!» дийип дога эдйәр. Ине, огланҗык хем дем алып башлаяр! Шонда Ыляс оны эҗесине говшурып: «Серет, сениң оглуң дирелди!» дийип, бегенчли айдяр. Ине, шонуң үчинем, онуң эҗеси дийсең багтлы.

Ехованың Элиша атлы ене бир белли пыгамбери барды. Ол Ылясың көмекчисиди. Эмма бирнәче вагтдан соң, Ехова Элишаның үсти билен хем гудрат гөркезйәр. Бир гезек Элиша Шунем шәхерине баряр. Шол шәхерде бир аял оңа көп ягшылык эдйәр. Соңра шол аялың оглы боляр.

Огланҗык улаланда, бир гүн мейдана какасының янына гидйәр. Бирденкә ол: «Келләм агыряр!» дийип гыгыряр. Өйүне гетиренлеринде болса өлйәр. Онуң өлүмине энеси нәхили гынанандыр! Ол шобада Элишаның янына гидйәр.

Элиша онуң өйүне гелип, огланың ятан отагына гирйәр. Ол Ехова дога эдип, чаганың үстүнде ятяр. Тизден огланҗыгың бедени йылап башлаяр. Соңра ол еди гезек асгыряр. Эҗеси оглуның диреленини гөрүп, нәхили бегенендир!

Шу гүнлере ченли гаты көп адам өлди. Оларың машгаласы ве достлары нәхили гынандыр. Адамлар өлини дирелдип билмейәр. Эмма Ехованың муңа гүйҗи етйәр. Онуң миллионларча адамы дирелтҗеги барада бираз соң билерис.

3 Патышалар 17:8—24; 4 Патышалар 4:8—37.