KOMO wix xnit chu xlakastakwananti, ¿la xmakgkatsilh mintse? Mintse, ¡lu xlipaxuwalh! Pero, ¿tlan nalakastakwanan chatum tiku ay ninitta? ¿Wi akgtum kilhtamaku akxni chuna tilalh?

Kaʼakxilhti tama chixku, puskat chu kgawasa unu kdibujo. Uma chixku wa palakachuwina Elías. Chu uma puskat tiku ni kgalhiy xchixku anta xala kachikin wanikan Sarepta, chu uma kgawasa nema wi unu kdibujo xkgawasa uma puskat. Akgtum kilhtamaku uma kgawasa tatatlalh. Tlakg snunalh chu nilh. Akxni tama kilhtamaku Elías wanilh uma puskat: Kakimaxki minkgawasa.

Elías lilh xlikilhmaktiy chiki kgawasa chu mamilh kputama. Chu tlawalh oración chu waniy Dios: Wix kintlati Jehová katlawa pi uma kgawasa kalakastakwanalh. ¡Chu kgawasa, tsukupa jaxanan! Akxni xlakastakwananitta, Elías tataktalh niku xwi xtse chu wanilh: ¡Kaʼakxilhti, staknama minkgawasa! Chu akxni akxilhli, lu lipaxuwalh.

Achatum xpalakachuwina Jehová xtukuwani Eliseo. Eliseo kskujni xwanit Elías. Titaxtulh kilhtamaku Jehová tlawalh pi Eliseo na katlawalh tuku nilay tamakanjla xla Dios. Akgtum kilhtamaku alh anta kkachikin wanikan Sunem, chu anta chatum puskat lu tlan likatsinilh. Wa uma puskat, alistalh kgalhilh chatum xkgawasa.

Akgtum kilhtamaku tsisajku xwanit, akxni tlakg lankata xwanit uma kgawasa, lakgalh xtlat anta kkakiwin. Kaj xalan wan: ¡Kakkatsama! Akxni linka kxchik, nilh. ¡Lu lilipuwa xtse! Lakapara alh putsa Eliseo.

Akxni chilh Eliseo, tanulh anta niku xtanuma xanin kgawasa. Eliseo tsukulh tlawaniy oración Jehová, chu laktamalh kgawasa xanin chu xmakni kgawasa tsukulh tsitsijwan chu makgtujun akgtixajnalh. Akxni tanulh xtse chu akxilhli pi staknama. ¡Lu lipaxuwalh!

Lhuwa kristianos nikgonitta chu wa xlakata lu lipuwankgonit xʼamigoskan chu xfamiliajkan. Akinin nila kamalakastakwaniyaw tiku nikgonita. Pero Jehová tlan kamalakastakwaniy. Alistalh naʼakxilhaw pi Jehová natlaway pi lhuwa millón kristianos nalakastakwanankgoy.