KAKUBA oba ofiire, mama wawe yakwehuliire ata kakuba ogarukamu kuba mwomezi? Yakusemerirwe muno! Baitu omuntu afiire nasobora kugaruka kuba omwomezi? Kirabaireho?

Dora omusaija ogu ali hanu, hamu n’omukazi n’omwojo. Omusaija ogu nuwe murangi Eriya. Omukazi ogu mufakati ow’omu rubuga orwa Zelefasi, kandi omwojo akaba ali mutabani we. Baitu kiro kimu, omwojo akarwara muno hanyuma yafa. Hanyuma, Eriya akagambira omukazi ogu ati: ‘Mpa omwojo ogu.’

Eriya akatwara omurambo gw’omwojo mukisiika eky’ahaiguru yagubyamya ha kitabu. Nukwo kusaba ati: ‘Ai Yahwe, foora omwana onu abe mwomezi obundi.’ Aho, omwojo akatandika kwikya! Nukwo Eriya kusirimuka n’omwana, akagambira omukazi ati: ‘Dora, omwana wawe mwomezi!’ Egi niyo nsonga habwaki omukazi ogu asemerirwe muno.

Omurangi wa Yahwe ondi mukuru akaba namanywa nka Erisa. Akaba mukonyezi wa Eriya. Baitu Yahwe akakoseza Erisa okukora eby’amahano. Kiro kimu, Erisa akagenda omu rubuga owa Sunamu. Hakaba haliyo omukazi w’ekisa kingi. Omukazi onu nawe akaba aine mutabani we.

Omwana obu yakuzire, kiro kimu akagenda kukora hamu na ise omu musiri. Mu kaanya kake, omwojo akatandika kukunga ati: ‘Omutwe gwange nigunsaasa!’ Hanyuma y’okutwarwa omuka, omwana ogu akafa. Kinu kakikatuntuza muno nyina! Mubwire obu, akagenda kweta Erisa.

Erisa obu yahikire aho, akagenda omukisiika nambere omurambo gwali guli. Erisa akasaba Yahwe n’okubyama ha murambo. Mubwangu, omurambo gw’omwana gukatandika kutagata, kandi hanyuma akesaimura emirundi musanju. Kinu kakikasemeza muno nyina obu yatahiremu n’okurora omutabani ali mwomezi!

Abantu baingi muno bafiire. Kinu kiretiire amaka n’enganjani zabu obujune bw’amaani. Itwe titwine obusobozi bw’okuhumbuura abafu. Baitu uwe Yahwe abwine. Mumaiso aho, nitwija kwegaho nkoku aligarra abantu baingi muno okuba abomezi.