ATI xa chame, pe ti xa chaʼkuxie ¿kʼu van x-elan ta xaʼi sba li ameʼe? ¡Xmuyubaj van tajek! Pe, ¿mi xuʼ van xchaʼkuxi li buchʼu chamem xae? ¿Mi oy van jech kʼotem ta pasel?

Kʼelavil li vinike, li ants xchiʼuk li kerem te ta lokʼole. Li vinike jaʼ li jchʼul alkʼop Eliase. Li antse jaʼ jun meʼon ants ta jteklum Sarepta, jaʼ yuni kerem li te xchiʼuke. Jun kʼakʼale, iʼipaj li uni kereme. Tsots iʼipaj tajek vaʼun cham. Jech oxal li Eliase xi la jyalbe li antse: Akʼbun li uni kereme, xut.

Li Eliase la jyikʼ muyel li anima kereme jech te la xpuchʼan ta tem. Vaʼun xi lik skʼopon Diose: O Jeova, chaʼkuxeso li kerem liʼe, xi. ¡Jech te lik xchaʼichʼ ikʼ li kereme! Laj ne li Eliase la syales tal, xi la jyalbe li antse: ¡Kʼelavil, li avole kuxul!, xut. Taje jaʼ xmuyubaj-o tajek li antse.

Yan jchʼul alkʼop yuʼun Jeova ti lek ojtikinbile jaʼ sbi Eliseo. Jaʼ yajkoltaobba Elías. Ta mas tsʼakal li Jeova la jyakʼbe spas skʼelobiltak juʼelal ti Eliseo eke. Jun veltae bat ta jteklum Sunem, oy te jun ants ti toj lek yoʼonton ta stojolale. Ta mas tsʼakal li ants taje la jyil jun yol.

Jun sob, kʼalal chʼi xaʼox jutuk li kereme, bat ta tsʼunobaltik ti bu ch-abtej li stote. Ta jech noʼox, xi lik avanuke: ¡Kʼux jol!, xi. Kʼalal la jyikʼik tal ta snae, cham. ¡Lik yat yoʼonton li smeʼe! Ta anil noʼox bat yikʼ tal li Eliseoe.

Kʼalaluk kʼot li Eliseoe, och ta kuarto ti bu oy li anima kereme. La skʼopon Jeova, vaʼun lik spatan sba ta sba li animae. Ta anil noʼox kʼixnaj sbekʼtal li olole, atʼisaj vukub velta. ¡Kʼalal och batel li meʼile toj xmuyubaj tajek kʼalaluk kuxul la jyil li skereme!

Ep buchʼutik chamem tana. Liʼe jaʼ ta xat-o yoʼontonik li yutsʼ yalaltak xchiʼuk li buchʼutik lek xojtikinik toʼoxe. Li voʼotike mu xuʼ xi jchaʼkuxesvanutik. Pe li Jeovae xuʼ yuʼun neʼ. Ta mas tsʼakal ta jchantik ti ta xchaʼkuxes ta smiyonal noʼox krixchanoetike.