Arali na fa, mme aṋu vha nga ḓipfa hani arali na vhuiselwa vhutshiloni? Vha nga takala nga maanḓa! Fhedzi naa muthu we a fa a nga dovha a tshila? Naa zwo no vhuya zwa itea?

Vhonani munna afha, na musadzi na mutukana muṱuku. Munna ndi muporofita Elia. Musadzi ndi tshilikadzi ya muḓini wa Tsarepata, mutukana ndi ṅwana wawe. Zwino, ḽiṅwe ḓuvha mutukana a mbo ḓi lwala. A mbo ḓi nana u lwala u swika a tshi fa. Zwenezwo Elia a vhudza musadzi: ‘Ḓisa mutukana ha nṋe.’

Elia a isa ṅwana o faho nḓuni ya nṱha a mu ladza kha vhulalo. Zwenezwo a rabela: ‘Yowee Yehova, ita uri mutukana a dovhe a tshile.’ Mutukana a thoma u fema! Zwenezwo Elia a mu humisela nḓuni ya fhasi a ri kha musadzi: ‘Vhona, murwa wau u a tshila!’ Ndi nga hone mme o takala ngaurali.

Muṅwe muporofita we a vha e muthusi wa Elia o vha a tshi pfi Elisa. Fhedzi Yehova a vhuya a mu shumisa u ita vhuṱolo. Ḽiṅwe ḓuvha Elisa a ya muḓini wa Sunema, he muṅwe musadzi a vha na vhulenda khae. Nga murahu uyu musadzi a vha na ṅwana wa mutukana.

Nga maṅwe matsheloni, mutukana o no aluwa, a bva a ya ha khotsi awe we a vha a tshi khou shuma tsimuni. Nga u ṱavhanya mutukana a lila: ‘Ṱhoho yanga i a rema!’ O no iswa hayani, mutukana a fa. Nga u ṱavhanya mme awe a ya a vhidza Elisa.

Musi Elisa a tshi swika, a dzhena nḓuni i re na ṅwana o faho. A rabela Yehova, a shuvhama kha mutumbu. Muvhili wa mutukana wa dudela nga u ṱavhanya, nahone a atsamula kasumbe. Mme awe a takala hani musi a tshi wana mutukana wawe a tshi tshila!

Vhathu vhanzhi-vhanzhi vho fa. Izwi zwo ṱungufhadza miṱa yavho na khonani dzavho. A ri na maanḓa a u vusa vhafu. Fhedzi Yehova u nao. Nga murahu ri ḓo guda uri u ḓo vhuisela hani dzimilioni nnzhi dza vhathu vhutshiloni.

1 Dzikhosi 17:8-24; 2 Dzikhosi 4:8-37.