Tantara 68

Tsaiky Aroe Nimpody Velon̈o

IZIKOA anao naty, baka iô nimpody velon̈o, karakôry eky ataon’ny mamanao? Misaora ravoravo mare izy! Fa olo maty ma mbala himpody velon̈o? Efa nisy ma raha zen̈y taloha tan̈y?

Zahava baka sary io. Misy lelahy ndreky man̈angy, baka iô tsaiky lelahy. Elia mpaminan̈y lelahy io. Man̈angy io efa naty vady. Tsaiky lelahy io zanany. Irô nipetraka ta Zarefata. Andra araiky, tsaiky io narary. Nahainare fo aretin̈inany, ke nahafaty izy. Elia amy zay nivolan̈a tamy mamany: ‘Amia zaho tsaiky io.’

Elia nitaondra tsaiky io tan̈abon’ny etazy tan̈y, baka iô izy nambelany tan̈abon’ny kibany. Izy amy zay nivavaka. Volan̈iny: ‘Mba vilaoma kony tsaiky ty Jehovah e.’ Tsaiky io baka iô nanampôno niain̈y! Elia amy zay nitaondra izy nijotso, nivolan̈a tamy mamany: ‘Zahava! Zanakanao velon̈o.’ Zen̈y nahavy man̈angy io ravoravo be.

Elisa an̈aran̈a mpaminan̈in’i Jehovah hafa koa. Izy mpitatahy Elia. Tandraraiky, Elisa nataon’i Jehovah nahavita fahagagan̈a. Elisa tamy zen̈y nandeha ta Sonema, ke tan̈y izy fanôjy man̈angy ten̈a tsara fan̈ahy taminany. Tsy elan’izin̈y, man̈angy io teraka lelahy.

Tsaiky io koa fa bebe, nan̈araka babany niasa tan-tsabo tan̈y. Tiô fo izy niafatra. Volan̈iny: ‘Marary lohako ô!’ Izikoa izy fa nindesin̈y nody, navy tan-tran̈o, naty. Nalahelo mamany tamy zen̈y! Lôso malaky izy nikaiky Elisa.

Elisa koa fa navy, izy niditry tamy tran̈o nisy faty io. Izy nivavaka tamy Jehovah, baka iô nandry tan̈abon’ny faty io. Tiô fo, nanjary nafana ain̈in’ny tsaiky io, aviô izy nitsien̈y impito aby. Mamany koa fa niditry, nahita zanany velon̈o, ravoravo be!

Efa naro olo naty zay. Havan-drô ndreky kamaradin-drô jiaby malahelo. Atsika tsy mahavita mamelon̈o olo naty aby in̈y. Jehovah mahavita. Atsika mbala hianatra fa izy mbala hamelon̈o olo naty aby in̈y.

1 Mpanjaka 17:8-24; 2 Mpanjaka 4:8-37.