ANA wawojo ali awile nikwimuka ku ŵawe, mama ŵawo mpaka apikane wuli mumtima mwawo? Mwangakayicila mpaka asangalale kwabasi! Nambo ana mundu juŵawile mpaka ajimucesoni nikola umi? Ana pakwete payitendekwe?

Amlole jwamlumejo, jwamkongwejo, soni kamcandako. Jwamlumejo ali jwakulocesya Eliya. Jwamkongwejo ali jwamkongwe jwamasije jwa ku Salefati, soni kamcandako kali mwanagwe. Lisiku line kamcandako kalwasile. Kajendelecele kulwala mnope mpaka kuwa. Kaneko Eliya ŵamsalile jwamkongwejo kuti: ‘Mumbani kamcandako.’

Eliya ŵamjigele mwanace jwam’we jula nikwawula najo m’cipinda camwinani, nikumgoneka pacindanda. Kaneko ŵapopesile kwa Mlungu kuti: ‘O Yehofa, atendekasye kuti kamcandaka kakolesoni umi.’ Kaneko kamcandako kakutanda kupumula! Sambano Eliya akukajigala nikwawula nako kuyipinda yapasi, ni akuŵeceta kwa jwamkongwe jula kuti: ‘Mlole, kamcanda kenu kala kali cijumi!’ Ni ligongo lyakwe mama ŵakweŵa akusangalala mnope.

Jwakulocesya jwakusosekwa jwa Yehofa jwine ali Elisa. Jwalakwe akutumicila mpela jwakamucisya Eliya. Nambo pandaŵi jakwe, Yehofa akumkamulicisya masengo Elisa kutenda yakusimonjesya. Lisiku line Elisa akwawula ku msinda wa Sunemu, kweleko jwamkongwe jwine akumtendela yambone mnope Elisa. Kaneko pali papite ndaŵi jwamkongweju akukola mwanace jwamlume.

Kundaŵi kwine, kamwanaceka kali kakusile, kapite kumigunda kukukamula masengo yimpepe ni babagwe. Kaneko mwakusisimucisya kamcanda kala kakulila kuti: ‘Mtwe ukumbweteka!’ Ali akajigalile kunyumba, kamcandaka kakuwa. Mamagwe akudandawula mnope! Ndaŵi jijojo akwawula kukumjigala Elisa.

Elisa payice panyumba pala, akwawula kucipinda kwakuli kamwanace kewe kala. Akupopela kwa Yehofa, soni akulijala penani pa kamwanace keweko. Mwacangakaŵa cilu ca mwanacejo cikutanda mtukuta, soni akupumasika kakwana kamsano ni kaŵili. Mama ŵakwe akusangalala kwabasi pakwika m’cipindamo nikukasimana kamcanda kawo kali umi!

Ŵandu ŵajinji awile. Yeleyi yitendekasisye maŵasa gawo ni acimjawo kudandawula mnope. M’weji nganitukola macili gakwimusya ŵandu ŵawe. Nambo Yehofa akwete macili gakwimucisya ŵawe. Kusogolo citulijiganye mwacacitendela pakwimusya mamiliyoni gamajinji ga ŵandu kuti akolesoni umi.