Historia 68

Chupa hombrehuiiniʼ ribiguetaʼ ribani

PA LII ñátiluʼ, ximodo raʼbuʼ ñuu jñaaluʼ pa nibiguetaʼ nibániluʼ yaʼ. Ñee cadi guizáʼ ñéchebe la? Peru, ñee zanda guibani tobi ni maʼ guti la? Huayaca ndiʼ dxiqué la?

Biiyaʼ hombre cá lu dibuju riʼ, gunaa ne hombrehuiiniʼ ca. Hombre ca labe Elías, ti ni riguixhená stiʼ Dios. Gunaa ca la? ti viuda de guidxi Sarepta laabe, xiiñibe nga hombrehuiiniʼ ca. Cadi xa ti dxi hombrehuiiniʼ ca raca huará, guizáʼ malu riuube dede rátibe. Óraque na Elías rabi jñaabe: Dané naa hombrehuiiniʼ ca.

Elías riné laabe ndaaniʼ sti cuartu nuu luguiáʼ ne raqué ribaʼquiʼ laabe lu ti luunaʼ. Óraque riníʼnebe Jiobá: Jiobá bisibani laʼ hombrehuiiniʼ riʼ. ¡Ne hombrehuiiniʼ que ricaa bi! Óraque Elías rindeteʼ laabe ne rabi jñaabe: ¡Biiyaʼ, xiiñiluʼ nabani! Guizáʼ rusiecheʼ ndiʼ laabe xa.

Sti ni riguixhená risaca stiʼ Jiobá nga Eliseo. Laabe racanebe Elías. Peru despué la? Jiobá laaca biquiiñeʼ Eliseo para guni milagru. Ti dxi, ora Eliseo rie ti guidxi láʼ Sunem la? Ti gunaa nabé raca nachaʼhuiʼ ne laabe. Despué gunaa riʼ rapa ti xiiñiʼ.

Biniisi si hombrehuiiniʼ riʼ la? bireebe ti siadóʼ zebe lu layú ra runi bixhózebe dxiiñaʼ. Málasi bibidxiaabe: ¡Guizáʼ cayuubaʼ ique! Ora rinécabe laabe ralídxibe la? raqué rátibe. ¡Aque triste riuu jñaabe xa! Oraqueca riyubi guxooñebe Eliseo.

Ora reeda Eliseo la? riuube ndaaniʼ cuartu ra nuu hombrehuiiniʼ maʼ guti que. Riníʼnebe Jiobá, ne óraque ráʼtabe luguiáʼ gueʼtuʼ que. Nin qué nindaa ridxaa ladi hombrehuiiniʼ que, ne laabe ruxhiáxibe gadxe tiru. ¡Pabiáʼ riecheʼ jñaabe ora riuu ndaaniʼ cuartu que ne ruuyaʼ laabe nabánibe yaʼ!

Stale binni maʼ guti ne ndiʼ huayuniná ca binnilídxicabe ne xhamígucabe. Laanu qué zanda diʼ gusibáninu gueʼtuʼ, peru Jiobá zanda guni ni. Despué zadúʼyanu de que laabe zandísabe millón binni para guibani sti biaje.

1 Reyes 17:8-24; 2 Reyes 4:8-37.