Abahüdaguni 69

Irahü íderaguei wéiriguti

SUBUDITI san bun ka lan tariñagubei irahü to? Tayanuhaña tuma würi to luagu Eliséu le lani Heowá profeta, luma katei burí buiti le ladügübei lau lídehan Heowá. Ibidiñeti luáguti Heowá tun, ladüga mama tan ísüraelina. Ligíati, ariha waméi ka lan uagu anuhán lubéi irahü to túbiñe würi to.

Würi to síriana. Naamán tanibei weiriei, hábuti lisudaranigu uburugu Siria. Aba hanügünu síriana irahü ísüraelina to, ábati terederun eseriwida tun lani Naamán weiriou.

Anihein aban luriban sandi luagu Naamán gíriti lépüra. Gayarati ladügün sandi le lun léiguadun lídangiñe hágürügü gürigia. Anihánti le tariñagubei irahü: ‘Lun hamuga lidin nabureme lumoun lani Heowá profeta Ísüraeli, lareidaguña hamuga lépüra luéi.’ Lárigiñe aba lariñawagun katei le lun Naamán.

Busenti Naamán lareidagun; ábati lidin Ísüraeli lúbiñe Eliséu. Adügati Eliséu lun láfuridun lubúein lun lariñagun lun Naamán lun lachibagun lungua sedü wéiyaasu lidan duna Hordán. Aba lagañidun Naamán, aba lariñagun: ‘Buítimati duna le nageirabei sügǘ luéi furumiñeguarügü lidunari Ísüraeli!’ Lárigiñe aba lidin. Ábati lariñagun aban lubúein lun: ‘Nabureme, lun hamuga aban lan katei hénrenguti lariñagubei Eliséu bun lun badügüni, badügübei hamuga. Kati uagu siñá lubéi bachibagun bungua, kei lariñagun bun?’ Aganba lumuti Naamán lubúein aba labuluchun sedü wéiyaasu lidan duna Hordán. Ábati larumadun lura!

Wéiriti lugundan Naamán. Aba lagiribudun lumoun Eliséu aba lariñagun lun: ‘Chouru naali guentó luagu ua lan Bungiu lidan sun Ubóu luéidigia uburugu Ísüraeli. Ligíati fuleiseibana ragübei idewesei le.’ Gama lumoun aba lariñagun Eliséu lun: ‘Uá, meresibirun nubéi.’ Subudi lumuti Eliséu luagu wuriba lan lun leresibirun idewesei, ladüga Heowá lan areidaguagüdübalin Naamán. Gama lumoun busén lumuti Geasí le lubúein Eliséu idewesei lúnguarügü.

Ligíati ladügünbalin katei le. Lárigiñe lidin Naamán, aba léibaagun Geasí lárigi ábati labuduni. ‘Lóunahañadina Eliséu ariñaga bun luagu busén lan lídangiñe idewesei houn fiú bisidatiñu sun liña hachülürün,’ liña. Iyeeni katei le ani ibidiñeti lun Naamán; ítara liñati aba líchugun somu burí katei lun.

Dan le lagiribudun Geasí, subudi laali Eliséu ka lan ladügübei. Ariñaga laali Heowá lun. Ligíati lariñagunbei: ‘Ladüga badügüni katei wuribati le, ladagara lépüra le meha luágubei Naamán buagu.’ Ligíati asuseredubei.

Ka san gayarabei wafurendeirun? Furumiñe, mosu ítara wamá kei irahü to lun wadimurehan luagu Heowá. Ladügüba le saragu buiti. Libiaman, moun lumuti wanaagun woungua kei meha Naamán, mosu gaganbadi wamá houn lubúeingu Heowá. Lǘrüwan, moun lumuti weyeehan kei Geasí. Ma gayarati wafurendeirun saragu katei tídangiñe Bíbülia?

2 Urúeigu 5:1-27.