NAHIBALO ka ba unsa kining gisulti sa gamayng batang babaye? Nagsugilon siya sa senyora mahitungod sa manalagnang si Eliseo, ug sa kahibulongang mga butang nga gitabang ni Jehova kaniya. Ang senyora dili usa ka Israelita. Tan-awon ta kon ngano ang bata anaa sa pinuy-anan sa maong senyora.

Ang senyora usa ka Sirianhon. Ang iyang bana mao si Naaman, ang pangulo sa Sirianhong kasundalohan. Ang mga Sirianhon nakabihag ning Israelitang batang babaye ug siya nahimong ulipon sa asawa ni Naaman.

Si Naaman may ngil-ad nga sakit gitawag sanla. Ang batang babaye nagsugilon sa asawa ni Naaman: ‘Nanghinaot ako ang akong agalon makaadto sa manalagna ni Jehova sa Israel. Siya mag-ayo kaniya sa iyang sanla.’ Sa ulahi kini gisugilon ngadto sa bana sa senyora.

Mihulom si Naaman sa pag-adto sa Israel. Sa nahiabot siya didto, miadto siya sa balay ni Eliseo. Gipagula ni Eliseo ang iyang ulipon ug misulti kang Naaman sa pagsugbo sa Suba sa Jordan sa pito ka higayon. Nakapasuko kaayo kini kang Naaman, ug siya mibiya. Naghunahuna siya nga ang mga suba sa Siria mas maayo kay sa bisan unsang suba sa Israel.

Apan, usa sa iyang mga ulipon midani kang Naaman sa pagbuhat sa giingon ni Eliseo. Busa si Naaman misalom sa iyang kaugalingon sa Suba sa Jordan makapito ka higayon. Sa iyang gihimo kini, naayo siya.

Si Naaman malipayon kaayo, busa mibalik siya kang Eliseo ug gusto nga mohatag kaniya sa usa ka gasa. Mibalibad si Eliseo: ‘Dili, dili ako modawat ug gasa.’ Nahibalo siya nga maoy usa ka sayop ang pagdawat sa usa ka gasa, tungod kay mao si Jehova ang nag-ayo kang Naaman. Apan ang ulipon ni Eliseo, si Giesi gusto sa gasa alang sa iyang kaugalingon.

Busa mao kini ang gibuhat ni Giesi. Human si Naaman makatalikod, siya miagpas kaniya. Siya miingon nga si Eliseo karon gusto na sa pipila ka gasa ni Naaman alang sa pipila niya ka higala nga mao pay pagduaw. Kini, dayag na lang, usa ka bakak. Apan si Naaman wala mahibalo nga kini usa ka bakak; busa siya mihatag kang Giesi sa pipila ka butang.

Apan, si Jehova nagsulti kang Eliseo sa gibuhat ni Giesi. Sa paghiuli ni Giesi, iyang nakaplagan nga ang sanla ni Naaman mibalhin kaniya ingon nga usa ka silot.

Unsay atong makat-onan gikan niining tanan? Una, kinahanglan kita mahisama nianang gamay batang babaye ug magsulti mahitungod kang Jehova. Ikaduha, dili kita magmapahitas-on, sama kang Naaman sa sinugdanan. Ug ikatulo, kinahanglan dili kita magbakak sama sa gibuhat ni Giesi.