¿BE WISI we bunolo ibu soggwissi? We omeg sunmaggwissi Eliseo gine, Jehovág gaya berbeged dulegi. Degine, soggwissi igi Jehová, Eliseo bendasdae ibmar nuegan imaggedgi. We omedi Israel gined suli, degsoggu Jehovásig ibmar wissuli. Anmar daggoena ibig bunolo we ome negyag gudii.

We ome Siria neggwebur ginedi. E sui nuga Naamán, Siria neggwebur e soldadomar e dummadi. Siria dorgan we bunolo gasmala; we bunolodi Israel ginedi, geb emisgindi Naamán e ome e maig gudii.

Naamán, boni isgana nigga, we boni nuga lepra. We boni inbaggwa dule ib sun san yaas imagge. We bunolo wegi soggwissi: ‘An dummad Israel neggweburse naele, Jehová gaya berbegedse, nabir e boni ega osulolesale’. Ome e sui sorba we ibmar wisgunonimoga.

Naamán nugubie; degsoggu Israelse nae soggali. Web owarmagdabgua, Eliseo negse nade. Eliseo na e maiga gudiid abin barmisa, geb Naamánga soge, ilagugle Jordán diwargi oboye. Naamán saeiddoge, geb soge: ‘¡An neggwebur diwarmar ar bur Israel diwarmarba nuegan sursi!’. Degi sogsagua, nadsunnad.

Auggi e mai wargwen ega soggali: ‘Dummad, ar Eliseo beg soggalile bur ibmar buled be imagye, be imasaled. ¿Ibig degidde geg be unnila obsunna, beg sogsadba?’. Naamán, ega e mai ibmar sogsad nabir iddosa, geb ilagugle Jordán diwargi obsa. ¡Deyob imasgua, e san gannar gannargwa nade, geb gannar nugusa!

Naamán yeeriddoge. Gannar Eliseos noniggi, geb Eliseog soge: ‘Emisgi an nue wisi, bela Nabbaneg naidgi Israel Babdummad unnila Babdummad sunsogedi. Degsoggu wis be we ibmar sue’. Auggine Eliseo soge: ‘Suli, an suo suli’. Eliseo wisi, nuedsuli we ibmar suedi, ar Jehová bur Naamán nudasadid. Auggi, Eliseo e maig gudiid dina, Guejazi nugadi, we ibmar niggubie.

Degsoggu, Naamán naded sorba, Guejazi abarmade geb ese owarmagdabbi. Geb soge: ‘Eliseo an barmiali beg sogega wis ibmar abeye, es addagmalad nonimaladgarye’. Auggi wedi gaggana. Degine, Naamándi wissuli; degsoggu Guejaziga ibmar abar ugsa.

Guejazi agbirnonigua, Eliseo bad wisi we dule ibmar imasad. Jehová ega sogsa. Degsoggu Eliseo wegi Guejaziga soge: ‘Ar be we ibmar isgana imas soggua, Naamán e boni be niggusunnoe’. ¡Geb deyobi abgayala gusa!

¿Ibu anmar we igargi durdagge? Gebbegwadgi, we bunolo yobi anmar gumogad abelemoga, geb Jehovásig emarga sunmagmogadi. Wedi sun emarga ibnuedga gue. Sogbogi, mer anmar na dummarba saoe igi Naamán gebe unni gusa, bur anmardi Jehovág arbamaladba ibsaoe. Geb sogbaagi, mer anmar Guejazi yobi gaggansaoe. Den buggidar anmar nabir Bibliag ibmar durdagsunna, ¿insoa?