EHUNGI 69

Okakazona make vatere omurumendu omunene nomunanḓengu

OVE mo tjiwa kutja okakazona nga make hungire tjike? Oko make raere omukazendu ngo ohunga nomuprofete waJehova Elisa, noviṋa oviwa Jehova mbye mu vatera okutjita. Omukazendu ngwi ke nakutjiwa Jehova mena rokutja eye kaMuisrael. Nambano indjeye tu tare kutja omena ratjike okakazona nga tji ke ri mondjuwo yomukazendu ngwi.

Omukazendu ngwi Omusirie. Omurumendu we oNaaman, omuhongore wotjimbumba tjaSirie tjovita. Ovasirie va huura okakazona nga, nave ke eta komukazendu waNaaman okurira okakarere ke.

Naaman wa ri nomutjise omuvi mbu isanewa ongana. Omutjise mbwi wina u yenena okutjita kutja onyama yomundu korutu i we. Okutja okakazona ka raera omukazendu waNaaman: ‘Ami me zeri kutja andakuzu omuhona wandje ma i komuprofete waJehova muIsrael. Eye etje mu verukisa komutjise we wongana.’ Kombunda ihi tja raerwa komurumendu we.

Naaman aa vanga tjinene okuveruka, okutja eye wa tya okuyenda ku Israel. Indu eye tja vaza ngo, eye wa ya kondjuwo yaElisa. Elisa wa hinda omukarere we ma karaere Naaman kutja nge ke rikohe povikando hambombari monḓonḓu Jordan. Ihi tja pindikisa Naaman tjinene, nu arire tja tja: ‘Ozonḓonḓu zokonganda ozosemba kombanda yonḓonḓu kangamwa mu Israel! Kombunda yokutja nao, Naaman otja ya.

Nungwari umwe wovakarere ve wa tjere: ‘Muhona, andakuzu Elisa we ku raere otjiṋa otjizeu, ove otjo tji tjita. Nambano okutjavi tji u hi nokurikoha uriri otja eye pa heye?’ Naaman wa puratena komukarere we nu wa ya na kaṱumba monḓonḓu Jordan povikando hambombari. Indu eye tja tjita nao, orutu rwe rwa yaruka ko naru veruka!

Naaman wa tjaterwa tjinene. Eye wa yaruka ku Elisa na ka tja: ‘Nambano me tjiwa tjiri kutja Mukuru waIsrael ongu ri Mukuru uatjiri mouye auhe. Okutja, arikana kambura otjiyandjewa hi ku ami.’ Nungwari Elisa we mu zira na tja: ‘Kako, ami hi nakukambura ko.’ Elisa aa tjiwa kutja ouposyo okukambura otjiyandjewa, mena rokutja Jehova ongwa verukisa Naaman. Nungwari Gehasi omukarere waElisa ee rivangere otjiyandjewa ho ku ye omuini.

Okutja Gehasi wa tjita nai. Kombunda yaindu Naaman tja ya, Gehasi wa tupuka okumutezera nga tje mu vaza. Gehasi wa tja ku ye: ‘Elisa we ndji hindi okukuraera kutja eye ma vanga tjiva vyoviyandjewa vyoye ma yandje komapanga we nge ya nai okumuryangera. Eye wa kora ovizeze. Nungwari Naaman kaa tjiwa kutja ovizeze, okutja eye wa yandja oviṋa tjiva ku Gehasi.

Indu Gehasi tja kotoka konganda, Elisa aa tjiwa imbi eye mbya tjita. Jehova we mu raera. Okutja eye wa tja ku ye: ‘Mena rokutja ove wa tjita otjiṋa otjivi hi, omutjise waNaaman wongana mau ya move.’ Nu moruveze ndo, pa tjitwa nao!

Eṱe matu rihongere ko tjike kehungi ndi? Rutenga, matu rihongo kutja twa sokukara tjimuna okakazona ngo nu atu hungire ohunga na Jehova. Ihi matji yenene okuvatera ovandu ovengi. Otjiṋa otjitjavari, eṱe katu sokuritongamisa tjimuna Naaman tja tjita rutenga, nungwari twa sokupuratena kovakarere vaMukuru. Nu otjiṋa otjitjatatu, eṱe katu sokukora ovizeze tjimuna Gehasi tja tjita. Kaviṋa ovingi nao mbi matu rihongo indu tji matu lese Ombeibela?

2 Ozombara 5:1-27.

Omapuriro womakonḓononeno