NDAI numsha hpa tsun nga ai hpe chye a ni? Yehowa a myihtoi Elisha a lam hte Elisha mau hpa amu madun dan lu na matu, Yehowa shi hpe karum ya ai lam hpaw mi wa hpe tsun dan nga ai. Ndai hpaw mi wa gaw Israela amyu nre ai majaw Yehowa a lam n chye ai. Ndai numsha gaw hpa majaw hpaw mi wa a nta kaw du nga ai lam hpe yu yu ga.

Ndai hpaw mi wa gaw Suri num langai mi re. Shi a madu wa gaw Suri hpyen du kaba Naman re. Suri masha ni gaw ndai Israela masha ni hpe rim wa ma ai. Shing rai Naman a madu jan a mayam shatai la ma ai.

Naman gaw manggang ngu ai ana lu ai. Ndai ana lu jang ashan ni hpe pyi, sha mat wa nna ashan galawk hkrat chye ai. Dai majaw numsha gaw Naman a madu jan hpe ning nga nna tsun ai. ‘Nye a madu gaw Israela mungdan kaw e, nga ai Yehowa a myihtoi wa hpang de sa lu yang grai kaja na re. Madu a manggang ana hpe shamai shatsai ya na re,’ nga ai. Dai hpang e ndai lam hpaw mi a madu wa hpe tsun dan ai.

Naman gaw shi a ana hpe grai shatsai la mayu ai majaw Israela mungdan de sa wa na, nga nna myit daw dan ai. Shi dai kaw e du jang Elisha nta de sa wa ai. Elisha gaw shi a mayam wa hpe shangun dat nna Naman hpe Yawdan hka de sa nhtawm sanit lang hka shin u; nga nna tsun shangun dat ai. Naman gaw dai ga hpe na jang grai masin pawt nna: ‘Nye a mungdan na hka ni gaw Israela mungdan hta nga ai hka shagu hta grau kaja ai,’ nga nna tsun ngut ai hte pru mat wa ai.

Raitimung shi a mayam langai mi gaw: ‘Madu e Elisha gaw yak ai amu hpe galaw shangun yang galaw na n rai ni? Shi tsun ai hte maren sa shin yang hpa byin wa na rai kun?’ nga nna shi hpe tsun ai. Naman gaw shi a mayam a ga hpe madat nna, Yawdan hka hta sanit lang hkum hpe dip kapruk dat ai hte, shi a hkum shan bai san pra wa ai.

Naman gaw grai kabu mat ai majaw Elisha kaw bai nhtang sa nna: ‘Israela mungdan na Karai Kasang chyu sha, mungkan hta teng man ai Karai Kasang re ai hpe atsawm sha ngai chye ni ai. Dai majaw ngai jaw ai kumhpa hpe, hkap la ya u,’ nga nna tsun ai. Raitimung Elisha gaw: ‘Ngai nhkap la nngai,’ nga nna bai tsun ai. Naman jaw ai kumhpa hpe la yang shut na re ai lam hpe Elisha gaw chye ai. Hpa majaw nga yang Naman a manggang ana hpe shamai ya ai wa gaw, Yehowa re. Raitimung Elisha a mayam Gehazi gaw shi a matu hkap la mayu ai.

Dai majaw Gehazi gaw ndai hku galaw ai. Naman pru mat ai hpang Gehazi shi a hpang hkan kagat nang nna, ‘Ya sha du ai jinghku ni hpe jaw na matu madu a kumhpa hpe jaw dat u nga nna, Elisha gaw ngai hpe tsun shangun dat ai’ nga ai. Teng sha nga yang ndai gaw masu ai lam re. Raitimung masu ai lam re ai hpe Naman n chye ai. Dai majaw Gehazi hpe kumhpa nkau mi jaw dat ai.

Gehazi nta bai du ai shaloi shi kaning di ai lam hpe Elisha gaw chye ai. Yehowa shi hpe tsun dan ai majaw re. ‘Dai rai nna ndai nshawp ai amu hpe nang galaw ndai majaw Naman a manggang ana nang kaw kap u ga,’ nga nna tsun dat ai. Tsun ai hte maren kalang ta byin mat wa ai.

Ndai lam hta na hpa kasi ningli yu la lu na kun? Shawn nnan e, anhte gaw ndai numsha zawn Yehowa a lam hpe tsun dan ra ai. Ndai hku tsun dan yang grai kaja na re. Ndai hku galaw yang akyu rawng ai. Lahkawng ngu na gaw, shawng nnan e, Naman zawn anhte hta myit tsaw myit dap nmai rawng ai. Karai Kasang mayam ni a ga hpe madat ra ai. Masum ngu na gaw, Gehazi zawn anhte nmai masu ai. Chyum Laika hti yang kaja ai kasi law law lu la ga ai n rai ni?