МЫ ХЪЫДЖЭБЗ цІыкІум жиІэжыр пщІэрэ сытми? Абы мы цІыхубзым жреІэж Елисей, Иеговэ и бегъымбарым, Алыхьым и къарумкІэ Іуэху телъыджэ ищІахэр. Мы цІыхубзым Иеговэ ицІыхукъым израилым щыщкъыми. ИІэт къэтщІэнти мы хъыджэбз цІыкІур мыбы и унэм къызэрыкІуа щІыкІэр.

Мы цІыхубзыр Сирием щыщщ. Абы и лІыр Неемэнщ. Ар Сирием я дзэпщщ. Сирием щыщ цІыхухэм мы израилым щыщ хъыджэбз цІыкІур гъэру къащтэри Неемэн и фызым унэІуту къыхуашащ.

Неемэн фаджэ уз къеузу хьэлъэу сымаджэт. А узыфэм цІыхум и лыр къригъэхуфынущ. Абы щхьэкІэ а хъыджэбз цІыкІум Неемэн и фызым жреІэ: «Си зиусхьэныр кІуэфамэ арат Израилым, Иеговэ и бегъымбарым деж. Абы занщІэу игъэхъужыфынут а фаджэ узыр». Куэд мыщІэу ар цІыхубзым и лІым жреІэж.

Неемэн апхуэдизкІэ хъужыну хуейти, Израилым кІуэну мурэд ещІ. Ар йоуэри Елисей и унэ макІуэ. Елисей и пщылІыр къыпрегъажьэри Неемэн жрырегъэІэ Иордан псым блэ зыщІигъэуэну. Абы Неемэн Іейуэ кърогубжьри: «Си хэку щежэх псыр нэхъыфІщ мы Израилым щежэх сыт хуэдэ псым нэхъри!» — жеІэри егъэзэж.

Арати, абы и пщылІ гуэрым жеІэ: «Зиусхьэн, Елисей нэхъ Іуэху гугъу гуэр къыбжиІауэ щытамэ, пщІэнутэкъэ? Иджы сыт–тІэ абы зэрыжиІэм хуэдэу псым зыщІэбгъауэ щІэмыхъунур?». Неемэн и пщылІым жиІэм йодаІуэри Иорданыпсым макІуэри блэ зыщІегъауэ. ЗыщІигъэуа нэужь, и Іэпкълъэпкъыр узыншэ, быдэ мэхъуж!

Неемэн гуфІэщауэ зыхуэубыдыжкъым. Елисей деж къегъэзэжри гуфІэжу жреІэ: «Иджы сэ хьэкъыу спхыкІащ Израилым я Алыхьыр тхьэуэ щыІэ псом нэхърэ зэрынэхъпэжыр. СынолъэІу, кхъыІэ, мы тыгъэр къысІых». «Хьэуэ, къыпІысхынукъым»,— жеІэ Елисей. Абы къыгуроІуэ тыгъэр къищтэн зэрымыхъунур, Неемэн зэрыхъужам и фІыщІэр зейр зэры–Иеговэр. Ауэ Елисей и пщылІ Гиезэ тыгъэр къищтэну хуейщ.

Еплъыт иджы абы ищІэм. Ар Неемэн кІэлъыщІопхъуэри жреІэ: «Елисей къыбжиІэжащ иджыпсту хьэщІэу къыхуэкІуа и ныбжьэгъухэм щхьэкІэ уи тыгъэхэм щыщ гуэрхэр къищтэну зэрыхуейр». ДауикІ, абы жиІэр пцІыщ. Ауэ Неемэн абы жиІэм шэч лъэпкъ къытримыхьэу ирет зыгуэрхэр.

Гиезэ унэм къыщигъэзэжам щыгъуэ, Елисей Іуэхур зытетыр Иеговэ къыжриІауэ ищІэкІэт. Арати, абы апхуэдэу зэрищІам щхьэкІэ жреІэ: «Апхуэдэу зэрыпщІам щхьэкІэ, Неемэн иІа узыр уэ къыпхуэкІуэнущ». ЖыІэн имыухыу зэрыжиІа дыдэм хуэдэу мэхъу!

Сыт дэ мы щапхъэхэм дагъэлъагъур? Япэрауэ, мы хъыджэбз цІыкІум ещхьу, дэри Иеговэ теухуауэ адрейхэм яжетІэн хуейщ. ИкІи абы фІы къыпэкІуэнущ. ЕтІуанэрауэ, дэ Неемэн япэ щІыкІэ зэрыщытам хуэдэу пагэу дыщыт хъунукъым. Дэ дедэІуэн хуейщ Алыхьым и лэжьакІуэхэм жаІэм. Ещанэрауэ, дэ пцІы дыупс хъунукъым, Гиезэ хуэдэу. Сыту сэбэп зыпылъ щапхъэ куэдыІуэ ит–тІэ Библием. Пэжкъэ?