MA NAKAANAW kʼaru yook xyeebʼal li chʼina ixqaʼal re li rixaqil jun li awabʼej? Yook chi aatinak chirix laj Eliseo, laj kʼanjel chiru li Jehobʼa. Yook ajwiʼ xyeebʼal naq li Jehobʼa natenqʼank re laj Eliseo. Li qanaʼchin inkʼaʼ naxnaw ani li Jehobʼa, xbʼaan naq moko aj Israel ta. Abʼan, kʼaʼut naq li chʼina ixqaʼal wank saʼ rochoch li qanaʼchin?

Li qanaʼchin kiyoʼlaak saʼ li tenamit Siria ut aj Naaman xkʼabʼaʼ li xbʼeelom. Laj Naaman najolomink rehebʼ laj puubʼ saʼ li tenamit Siria. Ebʼ laj Siria keʼxkʼam li chʼina ixqaʼal saʼ xtenamitebʼ, joʼkan naq kikanaak choʼq xmoos li rixaqil laj Naaman.

Laj Naaman wank saqlep chirix. Li ani wank xsaqlep naru natʼoyeʼk xtibʼel. Joʼkan naq li chʼina ixqaʼal yook xyeebʼal: ‹Wi laabʼeelom txik raj chi rilbʼal laj kʼanjel chiru li Jehobʼa, li winq aʼin naru t-isinq re xyajel›. Chirix chik aʼan keʼxye re laj Naaman li kixye li chʼina ixqaʼal.

Laj Naaman naraj kʼiraak, joʼkan naq xko chi rilbʼal laj Eliseo saʼ li tenamit Israel. Naq laj Naaman kiwulak, laj Eliseo kixye re li xmoos naq tixye re laj Naaman naq tixchʼaj ribʼ wuqubʼ sut saʼ li nimaʼ Jordan. Naq laj Naaman kirabʼi aʼin kʼajoʼ naq kichalk xjosqʼil ut kixye: ‹Jwal chaabʼilebʼ li nimaʼ saʼ lintenamit chiruhebʼ li wank arin Israel›. Naq kiraqeʼk xyeebʼal aʼin, kisutqʼiik.

Tojaʼ naq ebʼ li xmoos laj Naaman keʼxye re: ‹Wi laj Eliseo tatxtaqla xbʼaanunkil junaq li naʼlebʼ, taabʼaanu raj usta chʼaʼaj xbʼaanunkil. Kʼaʼut naq inkʼaʼ nakaawaj xsubʼal aawibʼ saʼ haʼ joʼ kixye aawe?› Chirix chik aʼan, laj Naaman kixsubʼ ribʼ wuqubʼ sut saʼ li nimaʼ. Tojaʼ naq kiʼok chi kʼiraak.

Sa saʼ xchʼool laj Naaman, joʼkan naq kisutqʼiik rikʼin laj Eliseo ut kixye chaq re: ‹Anaqwan chʼolchʼo chiwu naq li xYos ebʼ laj Israel, aʼan xYosil chixjunil li Ruuchichʼochʼ. Joʼkan naq xinchalk xkanabʼankil aawe li maatan aʼin›. Laj Eliseo kixye re laj Naaman: ‹Inkʼaʼ tinkʼul li maatan›. Laj Eliseo inkʼaʼ kixkʼul li maatan xbʼaan naq li Jehobʼa kikʼirtasink re laj Naaman ut maawaʼ aʼan. Abʼan laj Guehazi, li xmoos laj Eliseo, kiraj choʼq re li maatan.

Joʼkan naq laj Guehazi xko xtawbʼal chaq laj Naaman ut kixye re: ‹Xinxtaqla chaq laj Eliseo re naq taakʼe wiibʼ oxibʼ rehebʼ laamaatan xbʼaan naq keʼwulak rulaʼ›. Moko yaal ta li kixye laj Guehazi. Abʼan laj Naaman inkʼaʼ naxnaw naq laj Guehazi yook chi tikʼtiʼik chiru joʼkan naq kixkʼe joʼnimal li kipatzʼeʼk re.

Li Jehobʼa kixye re laj Eliseo li kixbʼaanu laj Guehazi. Joʼkan naq laj Eliseo kixye re: ‹Kʼaʼut xatmaakobʼk? Anaqwan li xsaqlep laj Naaman txik saʼ aabʼeen›. Tojaʼ naq kinujak chi saqlep laj Guehazi.

Kʼaru naqatzol chirix aʼin? Naqatzol naq tento tooʼaatinaq chirix li Jehobʼa joʼ kixbʼaanu li chʼina ixqaʼal. Xbʼaan naq aʼin naru naxtenqʼahebʼ li qas qiitzʼin. Xkabʼ, naq inkʼaʼ tqaqʼetqʼeeti qibʼ joʼ kixbʼaanu laj Naaman. Tento naq tooʼabʼinq chiruhebʼ laj kʼanjel chiru li Yos. Ut li rox, inkʼaʼ tootikʼtiʼiq joʼ kixbʼaanu laj Guehazi. Naabʼal li naʼlebʼ naxkʼe qe li Santil Hu, peʼyaal?