MBELA ou shi shii kutya okakadona oko otaka popi shike? Otaka lombwele omukulukadi oo kombinga yomuprofeti Elisa. Otake mu hokololele yo oikumwifilonga oyo Elisa a kala ta longo kekwafo laJehova. Omukulukadi oo ka li e shii Jehova, molwaashi ka li Omuisrael. Natu ka tale kutya osha enda ngahelipi opo okakadona oko ka kale meumbo olo.

Omukulukadi oo Omuarami (Omusiria). Omushamane waye omukulunhu womatanga ovakwaita Ovaarami, nedina laye oNaeman. Eshi Ovaarami va kwata ko Israel, okakadona oko kanini oka yandjwa po komukulukadi waNaeman ka ninge omupika waye.

Ndele Naeman okwa ka kwatwa komukifi hau ifanwa oudu woshilundu. Omukifi oo owa nyika oshiponga, molwaashi ohau dulu okuufa ko eenhumba dolutu lomunhu. Nomolwaasho, okakadona oko u wete mefano olo otaka lombwele omukulukadi waNaeman taka ti: ‘Ngeno okwa li ngoo omwene wange ta i komuprofeti waJehova kuIsrael, ngeno ota ka velulwa oudu waye woshilundu.’ Lwanima, omukainhu okwa ka hepaululila omushamane waye eendjovo odo.

Naeman okwa li a tokola okuya kuIsrael, molwaashi okwa li a halelela okuveluka. Eshi a fika muIsrael, okwa ya keumbo laElisa. Elisa okwa li a tuma ko omupiya waye a ka lombwele Naeman kutya ne ke likoshe luheyali momulonga waJordan. Ndele Naeman okwa li a handuka eshi a uda ngaho, nokwa ti: ‘Hamba koshilongo shetu hako ku na omilonga diwa di dule kokule omilonga adishe domuIsrael?’ Konima eshi a mana okupopya, Naeman okwa ya nokuli.

Ndele omupiya waye umwe okwa ya kuye, ndele ta ti: ‘Omufimanekwa, ngeno Elisa okwa li e ku lombwela u ninge oshinima shidjuu, ngeno owe shi ninga. Omolwashike ito i ashike ndele to ke likosha ngaashi e ku lombwela?’ Opo nee, Naeman okwa pwilikina komupiya waye ndele ta i e ke likoshe momulonga waJordan oikando iheyali. Eshi a mana okulikosha, okwa veluka nolutu laye ola li tali monika nawa.

Osho osha li sha hafifa Naeman neenghono. Okwa shuna kuElisa ndele ta ti kuye: ‘Paife ondi shi shii kutya Kalunga kaIsrael oye aeke Kalunga kashili kombada yedu alishe. Onghee hano, alikana tambula ko oshali yange.’ Ndele Elisa okwe mu nyamukula a ti: ‘Ahowe, itandi tambula oshali.’ Elisa okwa li e shi shii nawa kutya osha puka okutambula ko oshali oyo, molwaashi Jehova oye lela a li a velula Naeman. Ndelenee omupiya waElisa, Gehasi, okwa li e lihalela oshali oyo.

Natu tale kutya Gehasi okwa ka ninga po shike. Konima eshi Naeman va ya kokule kanini, Gehasi okwe ke va landula. Eshi e va hanga, okwa lombwela Naeman a ti: ‘Elisa okwa tuma nge kwoove u pe nge dimwe domeeshali odo, opo a ka pe ovaenda vaye ovo ve uya oku mu talela po paife.’ Gehasi okwa li ta popi oipupulu, molwaashi ka li a tumwa shili. Ndele Naeman okwe mu pa eeshali dimwe, molwaashi ke shi shii kutya Gehasi okwa li ta popi oipupulu.

Eshi Gehasi a alukila keumbo, Elisa okwa hangwa nale a lombwelwa kuJehova kutya Gehasi okwa li a ka ninga shike. Onghee hano, Elisa okwa lombwela Gehasi a ti: ‘Oudu waNaeman woshilundu otau ningi po woye, molwaashi owa ninga oshinima shii.’ Ohaluka, Gehasi okwa kwatwa koudu woshilundu pefimbo opo tuu opo.

Oshike hatu lihongo moiningwanima aishe oyo? Shotete, otu na okukala hatu lombwele vamwe kombinga yaJehova ngaashi okakadona oko kanini, molwaashi otashi ke va kwafela. Oshitivali, katu na okukala ovalinenepeki ngaashi Naeman a li pehovelo, ndele otu na okukala hatu dulika kovapiya vaJehova. Oshititatu, katu na okukala hatu popi oipupulu ngaashi Gehasi. Mbela itatu ke lihonga oinima ihapu ngeenge otwa kala hatu lesha Ombibeli?