YU NO wetin dis titi de tɛl dis uman? I de tɛl am bɔt Jiova in prɔfɛt we nem Ilaysha, ɛn di mirekul dɛn we Jiova de ɛp Ilaysha fɔ du. Di uman nɔ no bɔt Jiova bikɔs in nɔto Izrɛlayt. Lɛ wi si wetin mek di titi de na dis uman in os.

Di uman na Siryan. In man nem Neman. Na Neman na di bigman fɔ ɔl di sojaman dɛn na Sirya. Di Siryan dɛn kech dis Izrɛlayt titi, ɛn briŋ am to Neman in wɛf fɔ bi in savant.

Neman gɛt wan bad sik we dɛn kɔl lɛprɔsi. Dis na sik we de it-it pɔsin in bɔdi. So di Izrɛlayt titi tɛl Neman in wɛf se: ‘If mi masta go to Jiova in prɔfɛt we de na Izrɛl, i go wɛl.’ Afta sɔm tɛm, dɛn tɛl Neman wetin di titi se.

Neman bin want wɛlbɔdi bad, so i mekɔp in maynd fɔ go na Izrɛl. We i rich de, i go na Ilaysha in os. Ilaysha mek in savant go mit Neman ɛn tɛl am fɔ go was sɛvin tɛm na Riva Jɔdan. Dis mek Neman in at wam, so i tɔk se: ‘Di riva dɛn na Sirya bɛtɛ pas ɔl di riva dɛn na Izrɛl!’ As i tɔk dɔn so, na de i bigin go bak na in kɔntri.

Bɔt in savant dɛn tɛl am se: ‘Masta, if Ilaysha bin tɛl yu fɔ du sɔntin we at, yu fɔ dɔn du am! So na fɔ was, lɛk aw i se.’ Neman lisin to in savant dɛn ɛn go was na Riva Jɔdan sɛvin tɛm. We i was dɔn, i wɛl wantɛm wantɛm!

Neman gladi bad. I go bak to Ilaysha ɛn tɛl am se: ‘Na naw a no fɔ tru se di Gɔd na Izrɛl na in na di wan gren tru Gɔd. So duya, tek dɛn tin ya we a sɛn fɔ yu.’ Bɔt Ilaysha tɛl am se: ‘Nɔ, a nɔ go tek dɛn!’ Ilaysha no se i nɔ fayn fɔ tek dɛn tin ya bikɔs na Jiova mɛn Neman. Bɔt Ilaysha in savant we nem Geazi want dɛn tin ya.

Yu no wetin Geazi du? We Neman dɔn go, Geazi rɔnata am. We i mit am, i tɛl am se: ‘Ilaysha se mek a kam tɛl yu se i go want sɔm pan di tin dɛn we yu bin sɛn fɔ am. I se i want gi in padi dɛn we jɔs kam to am.’ Bɔt Neman nɔ no se na lay Geazi de lay, so i gi am sɔm pan di tin dɛn we i bin sɛn fɔ Ilaysha.

We Geazi go bak na os, Ilaysha no wetin i dɔn du bikɔs Jiova dɔn tɛl am. So i tɛl Geazi se: ‘Bikɔs yu dɔn du dis bad tin, Neman in lɛprɔsi go kam pan yu.’ Ɛn as Ilaysha tɔk dɔn so, na de di lɛprɔsi kam pan Geazi wantɛm wantɛm!

Wetin ɔl dis de tich wi? I de tich wi se, wi fɔ de tɔk bɔt Jiova lɛk di Izrɛlayt titi. Dis go ɛp pipul dɛn. Wi lan bak se, wi nɔ fɔ fil big bɔt wisɛf lɛk aw Neman bin fil fɔs. Bɔt wi fɔ du wetin Gɔd in savant dɛn de tɛl wi fɔ du. Ɛn wi nɔ fɔ lay lɛk aw Geazi bin lay. Wi kin lan bɔku tin we wi rid di Baybul, nɔto so?