¿MNIJÄˈÄP wiˈix yam jyënaˈanyë tyäˈädë kixyuˈunk? Yëˈë jam yˈanmaabyë tyäˈädë toxytyëjk mä wiˈixë Jyobaa tpudëkë Eliseeʉ ets ttunëdë mëjˈäjtënë. Tyäˈädë toxytyëjk kyaj tnijawë pën Jyobaa, yëˈko kyaj yˈisraelitëty. Pääty min nˈokˈijxëm tiko tyäˈädë kixyuˈunk tsyëënë mëdë tyäˈädë toxytyëjk.

Tyäˈädë toxytyëjk Siryʉ jäˈäy yëˈë. Yëˈë nyaˈayˈäjtë Na̱a̱mán diˈib nyiwintsënˈäjtë tsiptuumbëty jam Siryʉ. Ja tsiptuumbëty yëˈë myäjtstë tyäˈädë kixyuˈunk, päätyë netë tyäˈädë kixyuˈunk tyuumbëˈäjt myosëˈäjtë ja nyëdoˈoxyë Na̱a̱mán.

Na̱a̱mán myëdäjtypyë nety tuˈugë axëk päˈäm diˈib xyëˈäjtypy leprë. Tyäˈädë päˈäm yajnibutsypyë tsuˈutsy. Pääty yamë tyäˈädë kixyuˈunk tˈanëëmë tadë toxytyëjk: Koxyëbëtsë nwintsën tninejxyë Jyobaa kyugajpxy jam Israel, yaˈagëdakëpxyëp. Ok ta Na̱a̱mán tnijäˈäjë.

Kom ja Na̱a̱mán tsoˈogäämp ta ojts nyejxy jam Israel. Ko jam jyajty ta ojts nyejxy mä tyëjkë Eliseeʉ. Eliseeʉ ta tˈanmääjy tuˈugë tyuumbë ets tˈanëëmëdë Na̱a̱mán ets nëjx tsyiˈiy jëxtujk ok mä Jordán mëjnëë. Ta ko dëˈënë Na̱a̱mán yaˈanmääjy ta jyantsy jotˈambejky ets jyënany: ¡Mas oyatyëtyë nëë mätsë nax ngäjpn ets kyaj dyëˈënëty diˈib jaˈäjtp yä Israel! Ko dëˈën jyënäändääjy ta ojts jyëmbity.

Per ta ja tyuumbëty yˈanmääyëdë: Wintsën, koxyëbë Eliseeʉ të mdukˈaneˈemyëty ti diˈib mëjwiin kajaa xytyunët, ¿ti kyajxyëp xytyunyë? Pes, ¿tiko jeˈeyë nëjx mgatsiˈiy extëm të myaˈanëëmë? Na̱a̱mán ta tpëjktëjkë extëm ja tyuumbëty yˈanmääyëdë ets ta tsyiijy jëxtujk ok mä ja Jordán mëjnëë. ¡Ko tsyiidääjy ta ja nyiniˈx yˈagëdaktääjy!

Na̱a̱mán jotkujk jyantsy nyayjäˈäjë. Ta jyëmbijty mä ja Eliseeʉ ets tˈanmääjy: Tyam jënäämbëtsë net ko Dios diˈib Israel yëˈë dëˈën tukpäjk Diosˈäjtp abëtsemy Nyaxwinyëdë. Pääty, tunë mayˈäjtënë axäjë tyäˈädë diˈib yam namoopy. Perë Eliseeʉ ta jyënany: Kyaj, kyajts nˈaxäjëyaˈany. Eliseeʉ nyijäˈäp ko kyaj yˈoyëty tˈaxäjët, yëˈko yëˈë Jyobaa diˈibë nety të dyajtsoˈogyë Na̱a̱mán. Perë Geˈasii ja tyuumbë Eliseeʉ tsyojk ja diˈib myëmiinë Na̱a̱mán.

Pääty ko ja Na̱a̱mán ojts nyëjxnë, ta ja Geˈasii tpabëyëˈktsoˈony ets tnaspatë. Ta tˈanmääjy: Eliseeʉts të xykyexy etsëts mijts nˈanëëmët ko tsyojkypy waanë tadë mayˈaty, yëˈko yëˈë myoˈoyaambyë jäˈäy diˈib jam të nyijäˈtëdë. Dëˈën yˈandakyë Geˈasii. Ets kom ja Na̱a̱mán kyaj tnijäˈäjë pën andakp ta tmoojy tijaty.

Eliseeʉ të netyë Jyobaa tyuknijawëty ti të ttunyë Geˈasii, pääty ko jyëmbijty ta tˈanmääjy: Axëëk të mˈadëˈëtsy, pääty mijtsë netë tadë Na̱a̱mangë pyäˈäm mbäädanëp. ¡Ta netyë ja päˈäm pyatë!

¿Ti tyäˈädë maytyaˈaky xytyukniˈijxëm? Myëduˈuk, tsojkëp njäˈäyˈäjtëm extëm ja kixyuˈunk, nigäjx nimaytyakëmë Jyobaa. Ko dëˈën nduˈunëm mbäädë jäˈäy kajaa yˈoytyunyëty. Myëmajtsk, tsojkëp nmëmëdoˈojëmë Jyobaa tyuumbë ets kyaj nmëjˈäjt ngëjxmˈäjtëm extëm netyë Na̱a̱mán. Ets myëdëgëëk, kyaj yˈoyëty nˈandakëm extëmë Geˈasii. ¿Këdii mbäädë Biiblyë tijaty xyjantsy xytyukniˈijxëm?