¿Á XÍNI̱ÚN ndáaña káʼa̱n ñá loʼo yóʼo? Káʼa̱nñá xíʼin ñá nána yóʼo xa̱ʼa ta̱ Eliseo ta̱ profeta Jehová ña̱ ku̱a̱ʼání ña̱ʼa va̱ʼa kéʼéra xíʼin ndée Jehová. Ñá nána yóʼo kǒo xíni̱ñá xa̱ʼa Jehová, saáchi su̱ví ñá ñuu Israel kúúñá. Ta vitin sakuaʼayó, ndachun íyo ñá loʼo yóʼo veʼe ñá nána yóʼo.

Ñá ñuu Siria kúú ñá nána yóʼo. Ta yiíñá naníra Naamán, ta̱ xáʼndachíñu nu̱ú na̱ soldado na̱ ñuu Siria kúúra. Na̱ soldado ñuu Siria i̱xandúxana xíʼin iin ñá loʼo, ñá ñuu Israel ta ku̱a̱ʼa̱nñá xíʼinna, ta vitin káchíñuñá nu̱ú ñá síʼí ta̱ Naamán.

Ta̱ Naamán kúúmiíra kue̱ʼe̱ táʼyi ña̱ naní lepra. Ta ña̱yóʼo tá táʼyiña iin kóoyo ku̱ñuna íxaaña. Ña̱yóʼo kúú ña̱ káʼa̱n ñá loʼo yóʼo: ʼTá ná ku̱ʼu̱n yiíún nu̱ú ta̱ profeta Jehová ñuu Israel, ta̱yóʼo sandáʼararaʼ. Tándi̱ʼi ni̱ka̱ʼa̱nna ña̱yóʼo xíʼin ta̱ Naamán.

Ta̱ Naamán kúni̱ra nduva̱ʼara. Tasaá ke̱era ku̱a̱ʼa̱nra ñuu Israel. Tá ni̱xa̱a̱ra ñuu kán, ku̱a̱ʼa̱nra veʼe ta̱ Eliseo. Ta̱ Eliseo káʼa̱nra xíʼin iin ta̱ káchíñu nu̱úra ná ka̱ʼa̱nra xíʼin ta̱ Naamán ña̱ ná ku̱ʼu̱nra chika̱a̱ra miíra u̱xa̱ yichi̱ ini yu̱ta Jordán. Ta̱ Naamán ni̱sa̱a̱níra xa̱ʼa ña̱yóʼo ta̱ káchira: ʼVa̱ʼaka yu̱ta ñui̱ nu̱ú yu̱ta ñuu Israelʼ. Ña̱yóʼo ni̱ka̱ʼa̱nra, ta ku̱a̱ʼa̱nvara.

Soo iin ta̱ káchíñu nu̱úra, káchira xíʼinra: ʼTáta, su̱ví ña̱ ndeéví níka̱ʼa̱n ta̱ Eliseo xíʼún keʼún, ¿ndachun kǒo kándíxaún ña̱ káʼa̱nra?ʼ Ta̱ Naamán xi̱niso̱ʼora ña̱ ni̱ka̱ʼa̱n ta̱yóʼo xíʼinra. Tasaá chi̱ka̱a̱ra miíra u̱xa̱ yichi̱ ini yu̱ta Jordán. Tá ki̱tara kǒoka kue̱ʼe̱ kúúmiíra.

Ni̱kusi̱íní-ini ta̱ Naamán. Tasaá nda̱ndíkora nu̱ú ta̱ Eliseo, ta káchira xíʼinra: ʼVitin kúnda̱a̱-inii̱ iinlá Ndióxi̱ ndóʼó na̱ ñuu Israel kúú míí ta̱ nda̱a̱ ña̱ iníísaá ñuyǐví, ta vitin ña̱ʼa yóʼo kúú ña̱ táxii̱ ndaʼúnʼ. Soo ta̱ Eliseo káchira: ʼKǒo ndakiʼinñaʼ. Saáchi xínira va̱ása va̱ʼa ndakiʼinra ña̱yóʼo, chi Jehová kúú ta̱ sa̱ndáʼa ta̱ Naamán. Soo ta̱ Guehazí ta̱ káchíñu nu̱ú ta̱ Eliseo kúni̱ra ndakiʼinra ña̱yóʼo.

Tándi̱ʼi ki̱ta ta̱ Naamán ku̱a̱ʼa̱nra, saá xínu ta̱ Guehazí ku̱a̱ʼa̱nra sa̱tára tá ni̱niʼírara, káchira xíʼinra: ʼTa̱ Eliseo chi̱ndaʼá yi̱ʼi̱ va̱xii̱ ndakiʼii̱n loʼo ña̱ʼa ña̱ ni̱ka̱ʼún taxiún ndaʼa̱ra, ña̱ va̱ʼa taxiraña ndaʼa̱ na̱ ki̱xa̱a̱ nu̱úraʼ. Soo su̱ví ña̱ ndixa kúú ña̱yóʼo. Ta̱ Guehazí ta sándáʼviva kúúra ta̱ Naamán. Ta̱ Naamán ta̱xivara ña̱ʼa yóʼo ndaʼa̱ra.

Tá nda̱ndikó ta̱ Guehazí, ta̱ Eliseo xa̱kunda̱a̱va-inira xa̱ʼa ña̱yóʼo. Chi mií Jehová ni̱ka̱ʼa̱n xíʼinra. Ta ni̱ka̱ʼa̱nra xíʼin ta̱ Guehazí: ʼSu̱ví ña̱ va̱ʼa níkeʼún, ña̱ kue̱ʼe̱ táʼyi ta̱ Naamán, miíún ndoʼoña vitinʼ. Ta ndi̱ku̱n saá nda̱kiʼin kue̱ʼe̱ ta̱yóʼo.

¿Ndáaña sákuaʼayó xa̱ʼa ndiʼi ña̱ ku̱u yóʼo? Ña̱ nu̱ú sákuaʼayó xa̱ʼa, ná natúʼunyó xíʼin na̱ yiví xa̱ʼa Jehová táki̱ʼva i̱xaa ñá loʼo yóʼo, chi ña̱ va̱ʼa kúú ña̱yóʼo. Ña̱ u̱vi̱, va̱ása va̱ʼa kuta̱a-iniyó táki̱ʼva ni̱xi̱yo ta̱ Naamán, va̱ʼaka ná kandíxayó ña̱ káʼa̱n na̱ káchíñu nu̱ú Jehová. Ña̱ u̱ni̱, va̱ása va̱ʼa ka̱ʼa̱nyó tu̱ʼun vatá táki̱ʼva i̱xaa ta̱ Guehazí. Ku̱a̱ʼání ña̱ʼa kivi sakuaʼayó nu̱ú Biblia.