Tanojnots 69

Siuapil kipaleuij se tayekankej

¿TIKMATI toni nejin siuapil kiiluijtok siuat? Ika kinojnotstok Eliseo itanauatijkauj Jiova, uan mouiskatekimej tein Jiova kipaleuia maj kichiua. Siuat amo kiixmati Jiova, ta amo israelita. Yejika, maj tikitakan keyej siuapil yetok ichan nejin siuat.

Siuat katka kayot Siria. Inamik katka Naamán, tein kinixyekanaya tateuianij sirios. Sirios kiuikakej nejin siuapil israelita, uan kichiujkej isiuatakeual inamik Naamán.

Naamán kipiaya se kokolis tel amo kuali tein motokaytia kokolispalanilis. Nejin kokolis kichiua maj kokotoka se inakayo. Yejua nejin tein siuapil kiiluij siuat: ‘Komo noteko ueliskia kiitatiuj itanauatijkauj Jiova ne Israel, yej kipajtiskia ikokolis’. Satepan, kimatiltijkej inamik siuat.

Naamán kinekia pajtis; yejika kinemilij yas Israel. Keman ompa ajsik, yajki ichan Eliseo. Eliseo kiiluij itekitikauj maj kisani uan maj kiiluiani Naamán maj mopakaskia chikojpa itech ueyiat Jordán. Naamán tel kualanik, uan kijtoj: ‘¡Okachi kuali ueyiamej tein moajsij itech noueyi altepeuj uan amo kemej tein moajsij Israel!’ Kijtoj nejin uan yajki.

Sayoj ika itekitikauan kiiluijkej: ‘Tejuatsin, komo Eliseo mitsiluiskia xikchiua teisa tein ouij, tikchiuaskia, ¿keyej amo ueli timopaka kemej yej mitsiluij?’ Naamán kintajtolkakik itekitikauan uan mopankalakij chikojpa itech ueyiat Jordán. ¡Keman kichiuak nejin, inakayo chipauayak uan pajtik!

Naamán tel yolpakia. Yejika, mokepak kampa moajsia Eliseo uan kiiluij: ‘Axkan nikyekmatika ika imin Dios israelitas, sayoj yejua Dios tein melauak itech nochi Taltikpak. Yejika, ika kualtakayot, xikui nejin netetayokolil’. Sayoj ika Eliseo kiiluij: ‘Amo, amo uelis nikuis’. Eliseo kimatia ika amo kuali yetoya maj kikuini netetayokolil, porin katka Jiova akin kipajtijka Naamán. Sayoj ika Guehazí, itekitikauj Eliseo kinekia kikuis netetayokolil.

Yejika, yejua nejin tein kichiuak. Satepan keman Naamán yajki, Guehazí motaloj kiikanajsito, uan kiiluij: ‘Eliseo nechualtitanik maj nimitsiluiki ika kineki seki netetayokolilmej, ta kinimakasneki seki ikalpanojkauan tein yekin ajsikej’. Nejin katka se xolopijyot. Sayoj ika Naamán amo kimatia; yejika kimakak Guehazí netetayokolilmej.

Sayoj ika, Jiova ipa kimatiltijkaya Eliseo tein kichiujka Guehazí. Yejika keman mokepak kiiluij: ‘Kemej tikchiuak nejin tein amo kuali, kokolis tein kipiaya Naamán tejua tikpias’. ¡Uan ijkon mochiuak!

¿Toni technextilia nochi nejin? Yekinika, moneki tikchiuaskej kemej siuapil uan ika titajtoskej Jiova. Nejin kintelpaleuia taltikpakneminij. Ojpatika, maj amo timoueyinekikan kemej Naamán kichiuak yekinika, ta maj tikintakamatikan itekitikauan Jiova. Uan expatika, maj amo tixolopijtikan kemej Guehazí. ¿Melauj ika miak taman technextilia Biblia?

2 Reyes 5:1-27.