TLAPOUALISTLI 69

Se ichpokatsin okipaleui se tlakatl ueyititok

¿TIKMATI tlen kijtojtok nin ichpokatsin? Kitlapouijtok nin siuatsintli itech Eliseo, iteotlajtojki Jehová, uan itech milagros tlen Jehová kipaleuia ma kichiua. Nin siuatsintli amo kixmati Jehová, pampa amo israelita. Ik non, ma tikitakan tleka yetok nin ichpokatsin ikalijtik nin siuatsintli.

Nin siuatsintli ochantiaya Siria. Inamik okatka Naamán, akin okinyekanaya soldados sirios. Sirios okikitskijkej nin ichpokatsin israelita, uan okiuikilijkej isiua Naamán pampa kitekichiuiliskia.

Naamán okipiaya se kokolistli tlen itoka lepra. Nin kokolistli uelis kichiuas ma uetsi tonakayo. Uan nin tlen ichpokatsin okilui isiua Naamán: ‘Tla noteko ueliskia yas kitati iteotlajtojki Jehová tlen kajki itech altepetl Israel, ye uelis kipajtis itech ikokolis’. Satepan, okiluijkej ninmej tlajtolmej inamik siuatsintli.

Naamán okinekiaya mopajtis; ik non, oyajki itech altepetl Israel. Ijkuak oajsito ompa, oyajki ikalijtik Eliseo. Eliseo okinauati itekipanojki Guehazí ma kisa uan ma kilui Naamán ma moapolakti chikometipan itech aueyatl Jordán. Naamán okualanki miak, uan okijto: ‘Aueyatl tlen katej itech noueyi altepetl okachi kuali uan amo tlen onka itech Israel’. Ijkuak okijto nin, oyajki.

Maski ijkon, se itekipanojki okilui: ‘Noteko, tla Eliseo mitsiluiskia xikchiua itlaj tlen oui, tikchiuaskia. Uan, ¿tleka amo timoapolaktia, ijkon ken ye okijto?’. Naamán okikakili itekipanojki uan omoapolakti chikometipan itech aueyatl Jordán. ¡Ijkuak ijkon okichi, inakayo omoyektlali kuali uan opajtik!

Naamán oyolpakik miak. Omokuepki kanin okatka Eliseo uan okilui: ‘Axkan kema nikmati iDios altepetl Israel san ye melauak Dios itech nochi Tlaltikpak. Ik non, nimitstlatlaujtia, xikseli nin tetliokolil’. Maski ijkon, Eliseo okijto: ‘Amo, amo nikselis’. Eliseo okimatiaya amo kuali okatka kiseliskia nin tetliokolil, pampa ye Jehová akin okipajti Naamán. Maski ijkon, itekipanojki Eliseo okinekiaya kimoaxkatis nin tetliokolil.

Ik non, okichi nin tlamantli. Satepan oyajki Naamán, Guehazí omotlalo, okajsito Naamán uan okilui: ‘Eliseo onechualtitlanki ma nimitsiluiki kineki itlaj itech tlen otiktliokoliaya pampa kinmakas sekimej akinmej okitlajpalokoj’. Nin okatka se tlakajkayaualistli. Maski ijkon, Naamán amo okimatiaya; ik non, okimakak Guehazí sekimej tlamantli.

Ijkuak Guehazí oualmokuepato, Eliseo yokimatiaya tlen okichi. Jehová okimatilti. Uan Eliseo okilui: ‘Pampa otikchi nin tlamantli tlen amo kuali, axkan te tikpias ikokolis Naamán’. ¡Uan san niman ijkon okipanok!

¿Tlen uelis timomachtiskej itech nochi nin? Se tlamantli, moneki titetlapouiskej itech Jehová ijkon ken okichi ichpokatsin. Nin uelis tepaleuis miak. Ome tlamantli, amo ma timoueyimatikan ijkon ken achto okichi Naamán, moneki tikintlakamatiskej itekipanojkauan Jehová. Uan eyi tlamantli, amo ma titekajkayauakan ijkon ken okichi Guehazí. Timomachtiaj miak ijkuak tiktlajtoltiaj Biblia, ¿amo melauak?

2 Reyes 5:1-27.