OWA tseya kutya okakadhona haka otaka ti shike? Otaka hokololele omukiintu kombinga yomuprofeti gwaJehova Elisa niinima iikumithalonga mbyoka Jehova e mu kwatha oku yi longa. Omukiintu ina tseya Jehova, oshoka ye ke shi Omwiisrael. Natu tale kutya molwashike nduno okakadhona ke li megumbo lyomukiintu.

Omukiintu Omwaarami. Omulumentu gwe oNaeman, elenga lyiita yaAram. Aayarami oya kwata okakadhona haka okaIsrael nongashingeyi ko okalongeli komukiintu gwaNaeman.

Naeman oku na uuvu uutilithi, hau ithanwa onziya. Nokuli ohau vulu okugwitha ko iintimbu yoontumba dholutu lwomuntu. Ano okakadhona otaka lombwele omukiintu gwaNaeman: ‘Ngame onda hala omuwa gwandje a vule okuya komuprofeti gwaJehova kuIsrael. Ye ota ka panga onziya ye.’ Konima omukiintu ota lombwele omulumentu gwe shoka okakadhona ka ti.

Naeman okwa hala noonkondo okwaaluka; ano ye ota tokola a ye kuIsrael. Sho ye ta thiki hono, ota yi kegumbo lyaElisa. Elisa ota tumu omupiya gwe okulombwela Naeman kutya ne ki iyoge luheyali mOmulonga gwaJordan. Otashi geyitha Naeman noonkondo, nota ti: ‘Omilonga dhokegumbo omiwanawa dhi vulithe omulonga kehe muIsrael!’ Sho te shi ti, Naeman ota yi.

Ihe gumwe gwomaapiya ye ota ti kuye: ‘Tatekulu, andola Elisa okwe ku lombwelele sha oshidhigu u shi ninge, andola owe shi ningi owala. Omolwashike ngoye itoo vulu okwiiyoga owala ngaashi ye a ti?’ Naeman ota pulakene komupiya gwe nota yi e ki iyoge lwiikando iheyali mOmulonga gwaJordan. Sho te shi ningi, olutu lwe otalu aluka!

Naeman okwa nyanyukwa noonkondo. Ye ota galukile kuElisa nota ti kuye: ‘Ngashingeyi ondi shi shi nawa kutya Kalunga komuIsrael oye awike Kalunga kashili kevi alihe. Alikana taamba ko omagano gandje ngaka.’ Ihe Elisa ota yamukula: ‘Aawe, ngame itandi ga taamba ko.’ Elisa oku shi shi kutya otashi ka kala sha puka okutaamba ko omagano, oshoka okwa li oJehova ngoka a aludha Naeman. Ihe omupiya gwaElisa Gehasi okwa hala omagano ga ninge po ge.

Osho shoka Gehasi ta ningi: Sho Naeman a yi, Gehasi ota matuka e mu landula. ‘Elisa okwa tumu ndje ndi ku lombwele kutya ye okwa hala lela gamwe gomomagano goye molwookuume ke mboka ye ya ngashingeyi ye mu talele po,’ Gehasi ta ti. Osho iifundja iitokele. Ihe Naeman ke shi shi ngele osho iifundja; ano ye ota gandja yimwe yomiinima kuGehasi.

Sho Gehasi te ya pegumbo, Elisa oku shi shi shoka ye a ningi. Jehova okwe mu lombwele. Omolwashoka ye ta ti: ‘Molwashono ngoye owa longo iinima mbino iiwinayi, ngoye oto ka mona uuvu wonziya waNaeman.’ Nokwe wu mono owala mbalambala!

Oshike tse tatu vulu okwiilonga muka? Shotango, osho kutya tse otu na okukala ngaashi okakadhona nokupopya kombinga yaJehova. Otashi vulu okukwatha aantu noonkondo. Oshitiyali, tse katu na okukala nuuntsa ngaashi Naeman a li tango, ihe tse otu na okuvulika kaapiya yaKalunga. Noshititatu, tse katu na okupopya iifundja ngaashi Gehasi. Tse otatu vulu okwiilonga oshindji uuna tse tatu lesha Ombimbeli, hasho mbela?