ƐZE edwɛkɛ mɔɔ kakula raalɛ ekyi ne ɛlɛka la ɔ? Ɔlɛka Gyihova ngapezonli Yilaehya yɛɛ nwanwane ninyɛne mɔɔ Gyihova dua ɔ nwo zo yɛ la anwo edwɛkɛ yeahile bɛlɛra ne. Bɛlɛra ne ɛnze Gyihova anwo edwɛkɛ ɔluakɛ ɔnle Yizilayɛnli. Akee maa yɛnlea deɛ mɔɔ ɔti kakula raalɛ ne wɔ bɛlɛra ne sua nu la.

Bɛlɛra ne le Seleanli. Ɔ hu a le Neeman, mɔɔ le Selea ɛlɔnema ne azo safohyenle kpanyinli la. Seleama hyele Yizilayɛnli kakula raalɛ ekyi ɛhye, na bɛvale ye bɛrɛlɛle Neeman aye ne kɛ ɔyɛ ye sonvolɛ.

Neeman lɛ ewule ɛtane bie mɔɔ bɛfɛlɛ ye kokobɛ la. Ewule ɛhye kola maa awie nwonane ne bie bɔbɔ tete gua. Ɔti mɔɔ kakula raalɛ ne ɛlɛka ahile Neeman aye ne la ɛne: ‘Me kunlu a anrɛɛ me menle kɛhɔ Gyihova ngapezonli ne mɔɔ wɔ Yizilayɛ la ɛkɛ ne. Anrɛɛ ɔbayɛ ye kokobɛ ne ayile.’ Amozii bɛhanle ɛhye bɛhilele bɛlɛra ne ahu ne.

Neeman akunlu a anrɛɛ yede kpɔkɛ; ɔti ɔbɔle kpɔkɛ kɛ ɔkɔ Yizilayɛ. Mekɛ mɔɔ ɔdwule ɛkɛ ne la, ɔhɔle Yilaehya sua nu. Yilaehya manle ye sonvolɛ ne vindele razele Neeman kɛ ɔhɔbia Azule Dwɔdan ne anu fane nsuu. Ɛhye hanle Neeman ɛya kpole na ɔhanle kɛ: ‘Azule mɔɔ wɔ me sua zo la biala le kpalɛ tɛla azule mɔɔ wɔ Yizilayɛ la!’ Ɔhanle ɛhye ɔwiele la, Neeman dɔle adenle zo kɛ ɔkɔ.

Na ye sonvolɛma ne mɔ zele ye kɛ: ‘Yɛmenle, saa Yilaehya hanle kɛ ɛyɛ debie ɛsesebɛ bie a, anrɛɛ ɛkɛyɛ. Na duzu ati a ɛnrɛhola ɛnrɛdɔ azule ne anu kɛmɔ yeha la ɛ?’ Neeman diele ye sonvolɛma ne na ɔhɔdɔle Azule Dwɔdan ne anu fane nsuu. Mɔɔ ɔyɛle ye zɔ la, ɔdele kpɔkɛ na ɔ nwo yɛle kɛnlɛma bieko!

Neeman anye liele kpole kpalɛ. Ɔziale ɔhɔle Yilaehya ɛkɛ ne na ɔzele ye kɛ: ‘Kɛkala, akee menwu kɛ Nyamenle ne mɔɔ wɔ Yizilayɛ la a le nɔhalɛ Nyamenle kokye mɔɔ wɔ azɛlɛ ye muala azo a. Zɔhane ati, mesɛlɛ wɔ, die me sa nu ahyɛlɛdeɛ ɛhye.’ Na Yilaehya buale ye kɛ: ‘Kyɛkyɛ, menrɛlie.’ Ɛnee Yilaehya ze ye kɛ ɔle ɛtane kɛ ɔkɛlie ahyɛlɛdeɛ ne, ɔluakɛ Gyihova a yɛle Neeman ayile a. Noko ɛnee Yilaehya sonvolɛ Gɛheezae kulo ninyɛne ne.

Ɔti mɔɔ Gɛheezae yɛle la ɛne. Mekɛ mɔɔ Neeman hɔle la, Gɛheezae nriandile doale ye. Gɛheezae zele ye kɛ: ‘Yilaehya ɛzoa me kɛ membaze wɔ kɛ maa ye ahyɛlɛdeɛ ne bie na ɔva ɔmaa ɔ gɔnwo mɔ mɔɔ ɛra kɛ bɛbakpɔla ye la.’ Nɔhalɛ nu ɛhye le adalɛ. Noko ɛnee Neeman ɛnze kɛ ɔle adalɛ; ɔti ɔmanle Gɛheezae ninyɛne ne bie.

Mekɛ mɔɔ Gɛheezae ziale rale sua nu la, ɛnee Yilaehya ze mɔɔ yeyɛ a. Ɛnee Gyihova ɛha ɛhile ye. Yemɔti ɔzele ye kɛ: ‘Ɔluakɛ wɔyɛ ɛtane ɛhye la ati, Neeman kokobɛ ne badila wɔ.’ Na ɛkɛ ne ala, ɔyɛle zɔ!

Duzu a yɛkola yɛsukoa yɛfi ɛhye anu a? Mɔɔ lumua la, ɔwɔ kɛ yɛyɛ kɛ kakula raalɛ ekyi ne la na yɛka Gyihova anwo edwɛkɛ yɛkile awie mɔ. Ɛhye ɛyɛlɛ le nvasoɛ dɔɔnwo. Mɔɔ tɔ zo nwiɔ, ɔnle kɛ yɛmemaa yɛ nwo zo kɛmɔ Neeman lumua yɛle la, emomu ɔwɔ kɛ yɛtie Nyamenle azonvolɛ ne mɔ. Mɔɔ tɔ zo nsa, ɔnle kɛ yɛbɔ adalɛ kɛ Gɛheezae la. Asoo yɛnrɛhola yɛnrɛzukoa dɔɔnwo yɛnrɛvi Baebolo ne ɛgengalɛ nu ɔ?