¿GI PÄDI te mää nuni nxutsi? Xipi nuni ꞌme̱hñä de Eliseo, näꞌä rä mꞌe̱hni Äjuä. ꞌNehe xipi de nuꞌu̱ yä milagro pe̱fi Eliseo ko rä mfatsꞌi Jeoba. Nuni ꞌme̱hñä himi pädi Jeoba, ngeꞌä hingä mi rä israelita. Hänge, ma gä handihu̱ hanja nunä nxutsi bi zo̱ho̱ ha rä nguu nunä ꞌme̱hñä.

Nunä ꞌme̱hñä mrä me Siria, rä däme mi rä thuhu Nämän, näꞌä ndä de nuꞌu̱ yä soldado mi yä me Siria. Nuyu̱ yä soldado xki zitsꞌi nunä nxutsi, hänge mi mꞌe̱go ha rä ngu Nämän.

Nämän bi zu̱di nꞌa tsꞌo ñheni tꞌembi lepra. Nunä ñheni di japi dä dagi rä ngo̱ yä jäꞌi. Hänge nunä zi nxutsi bi ꞌñembäbi rä hmuu: “Mu̱ mä hmuu Nämän dä ma dä nuu näꞌä rä mꞌe̱hni Jeoba bi ꞌmu̱ ha Israel, näꞌä ma dä yꞌo̱the de nuni rä hñeni”. ꞌNepu̱ bi sipi Nämän näꞌä xki mää näꞌä nxutsi.

Nämän mi ne dä ñꞌo̱the de näꞌä lepra, hänge bi ma pa Israel, ha rä ngu Eliseo. Eliseo bi ꞌme̱pi nꞌa rä ꞌme̱go bi bo̱ni pa bi xipi Nämän ge xä ma xä ñhi yoto mꞌiki ha rä däthe Jordan. Pe Nämän xa bi nkue̱, ꞌne bi ꞌñenä: “¡Nuꞌu̱ yä däthe bi ja ha mä hnini mänꞌa xä ñho ke gatꞌho nuyu̱ yä däthe ja ha Israel!”. Mi mängä njabu̱, bi ma.

Pe nꞌa de nuꞌu̱ yä ꞌme̱go bi ꞌñembi: “Zi hmuu, mu̱ Eliseo xä xiꞌi xkä ja nꞌa rä tꞌo̱tꞌe xä ñhei, hää xkä pe̱fi. Nuꞌmu̱, ¿por hanja hingi ne gi ma gi ñhi ha rä däthe Jordan ja ngu bi xiꞌi?”. Nämän bi yꞌo̱te rä ꞌme̱go ꞌne bi yu̱i yoto mꞌiki ha rä däthe Jordan. Mi bo̱ni de ha rä dehe, ¡bi mꞌe̱di näꞌä tsꞌo hñeni mi tsu̱di!

Nämän xa bi johya, bi mengi pa dä nuu Eliseo ꞌne bi ꞌñembi: “Nubye̱ hää di pädi ge rä Zi Dada de Israel, ho̱nse̱ꞌä rä Zi Dada de gatꞌho rä Xiꞌmhai. Hänge, hñäni nunä regalo”. Pe Eliseo bi ꞌñenä: “Hinä, hingä ma gä häni”. Eliseo mi pädi ge hinxä ñho dä hñäni näꞌä regalo mi umbi Nämän, ngeꞌä Jeoba go geꞌä xki yꞌo̱the. Pe Geasi, näꞌä rä ꞌme̱go Eliseo hää mi ne dä hñäni nuꞌu̱ yä hogä ntꞌuni.

Hänge mꞌe̱fa de xki ma Nämän, Geasi bi nextꞌi pa bi zu̱di ꞌne bi ꞌñembi: “Mä hmuu bä pe̱nkägi gä xiꞌi ge ne gi rꞌaki rꞌa de nuꞌu̱ yä regalo ngi umbi pa rꞌa yä zo̱nte ja ri zo̱ho̱”. Pe Nämän himi pädi ge hingä mäjuäni näꞌä mi mää Geasi, hänge bi umbi näꞌä bi yꞌadi.

Jeoba bi xipi Eliseo näꞌä xki me̱fi Geasi, hänge mi mengi Geasi bi ꞌñembi: “Ngeꞌä xkä pe̱fi nunä tsꞌoki, nubye̱ rä lepra Nämän go ma dä zu̱ꞌi”. ¡Nguntꞌä geꞌä bi thogi Geasi!

¿Te utkägihu̱ nunä thogi? Nꞌaa, ge dä za gä fatsꞌihu̱ märꞌa mu̱ gä xipihu̱ de rä Zi Dada Jeoba ja ngu bi ja näꞌä zi nxutsi. Yoho, hingi ho gä ñꞌetsꞌihu̱ ngu Nämän, ꞌne mähyoni gä o̱tehu̱ yä ꞌme̱go Äjuä. Hñuu, mähyoni gä mäñhu̱ nzäntho näꞌä mäjuäni, ꞌne hingä njahu̱ ngu Geasi. ¿Hänge rä Mäkä Tꞌofo utkägihu̱ ndunthi?