¿LA AWETAʼM su tijan kubʼij ri alaj ali riʼ? Tijan kubʼij che ri ixoq ri täq jastaq, o kos, utz kubʼan ri ajqʼaxal utzij ri Jehová ubʼiʼ Eliseo rumal utoqʼobʼ ri Jehová. Wajun ixoq riʼ retaʼm täj chirij Jehová, rumal che aj israelita täj. Rumal laʼ, chqilaʼ suche kʼo wajun ali pa rachoch wajun ixoq riʼ.

Wajun ixoq are siria. Ri rachajil ubʼiʼ Naamán, are ajkʼamal bʼe chike ri täq ajchʼoj rech sirio. Ri täq sirios xkekʼam bʼi wajun ali israelita riʼ, Rumal laʼ are xubʼan umos rixoqil Naamán.

Naamán kʼo jun itzelalaj yabʼil chirij ubʼiʼ lepra. Wajun yabʼil riʼ kubʼano che ri täq tiʼoj ketzaqik. Are waʼ ri tijan kubʼij ri ali: ‹Wet ri wajaw kkunik kbʼe rukʼ ri ajqʼaxal utzij Jehová pa Israel, areʼ kresaj wajun yabʼil lepra che›. Tekʼuriʼ xubʼij che ri rachajil ri ixoq.

Naamán kraj kkunaxik; rumal laʼ xbʼe pa Israel. Chiʼ xopan jelaʼ, xbʼe pa rachoch Eliseo. Eliseo xubʼano che xel lo jun umos tekʼuriʼ xubʼij wariʼ che Naamán che kuchʼaja ribʼ wuqubʼ mul pa ri nimalaj jaʼ ubʼiʼ Jordán. Naamán sibʼalaj xpe royowal, o riwal, rumal laʼ xubʼij wariʼ: ‹¡Ri täq jaʼ e kʼo pa nutinamit are e utz na chuwäch ri täq jaʼ e kʼo pa Israel!› Xubʼij kan wariʼ, tekʼuriʼ xbʼek.

Tekʼuriʼ ri täq umos xkebʼij wariʼ: ‹Naamán, wet Eliseo kubʼij che rajawaxik kabʼan jun jasach, o kos, che kʼäx ubʼanik. Kabʼan waʼ, Rumal laʼ, chabʼanaʼ su xubʼij chawe›, Naamán xuta su xkebʼij ri täq umos che, rumal waʼ xunim, o xumin, ribʼ pa ri jaʼ Jordán wuqubʼ mul. ¡Chiʼ xubʼan wariʼ, xel ri yabʼil chirij xuqujeʼ xubʼan utz ubʼaqil!

Naamán sibʼalaj xkikotik. Xtzalij rukʼ Eliseo xuqujeʼ xubʼij wariʼ che: ‹Wa kimik kinchʼobʼo che ri Ajawaxel rech Israel xa jun kʼolik puwiʼ ronojel ruwäch ulew. Rumal waʼ, chabʼana toqʼobʼ, chakʼama wajun sipanik riʼ› tekʼuriʼ Eliseo xubʼij: ‹Kinkʼam täj›, xchaʼ. Eliseo kuchʼobʼo che utz täj kukʼam wajun sipanik riʼ, rumal che are Jehová xkunan Naamán. Tekʼuriʼ Guehazí ri umos Eliseo kraj kukʼam ri sipanik.

Rumal waʼ xubʼan wariʼ. Chiʼ bʼenäq chik Naamán, Guehazí xbʼe che uriqik Naamán pa bʼe. ‹Ri Eliseo xinutaq loq che kinbʼij chawe che kraj nikʼaj che ri sipanik rumal kraj kuya chike nikʼaj ajsolinel›, xchaʼ. Wariʼ qastzij täj. Ri Naamán xuchʼobʼ täj; rumal laʼ xuya che Guehazí nikʼaj chike wa täq jastaq riʼ.

Chiʼ Guehazí xtzalijik, Eliseo xuchʼobʼo su xubʼano. Rumal che Jehová xubʼij che. Rumal laʼ Eliseo xubʼij wariʼ che: ‹Suche xabʼan wajun itzelal riʼ, ri ulepra Naamán kqʼax kan chawe›. Xchaʼ che ¡jewaʼ xbʼanik!

¿Su kqetaʼmaj chirij wariʼ? Nabʼe, rajawaxik kqabʼan qe ri xubʼan ri alaj ali, che kojchʼaw chirij Jehová. Wariʼ sibʼalaj utz. Ukabʼ, are kqabʼan ta nim cheqibʼ junam rukʼ Naamán nabʼe, are rajawaxik kqanimaj ri täq upatanel ri Jehová. Urox kqamol ta tzij junam rukʼ xubʼan Guehazí. Kojkunik kqetaʼmaj kʼi täq chirij ri Loqʼalaj Pixabʼ ¿La qastzij?