KODI musadziwa pinalonga kantsikana aka? Iye akupanga sinyala pya mprofeta wa Yahova, Elixa, na pinthu pyakudzumatirisa pinamphedza Yahova kucita. Sinyala nkhabe dziwa pya Yahova thangwi iye si Muisrayeli tayu. Tendeni tione, mphapo, thangwi yanji ntsikana ali panyumba ya sinyala.

Sinyala ndi Musirya. Mamunace ndi Namani, nkulu wa anyankhondo a Sirya. Asirya akhadakwata kantsikana aka ka Muisrayeli, mbakabweresa kwa nkazi wa Namani kuti kakhale nzakazi wace.

Namani akhali na utenda wakuipa wakucemerwa matanya. Utenda unoyu ungakwanise kucitisa nyama ingasi ya munthu kugwa. Natenepa, pyenepi ndipyo pidapanga ntsikana nkazi wa Namani: ‘Ine ndikhafuna kuti mbuyanga mbadaenda kwa mprofeta wa Yahova ku Israyeli. Iye mbadamuwangisa ku matanyace.’ Buluka penepo ipi pyalongwa kwa mamuna wa sinyala.

Namani akhafunadi kakamwe kuwangiswa; natenepa atonga kuenda ku Israyeli. Mudafika iye kweneku, aenda ku nyumba ya Elixa. Elixa atuma nzakazi wace kubuluka towera akapange Namani kuti aende kasambe kanomwe m’Nkulo wa Yoridani. Pyenepi pyacitisa Namani kuipirwa kakamwe, mbalonga: ‘Mikulo ya kwathu ndi yadidi kupiringana mikulo yonsene ya Israyeli!’ Pakumala kulonga ipi, Namani abuluka.

Mbwenye mbodzi wa anzakazi ace ampanga: ‘Mbuya, mbidakhala kuti Elixa akupangani kucita cinthu cakunensa, imwe mbumudacita. Thangwi yanji imwe nkhabe kuenda basi kasamba, ninga mudalonga iye?’ Namani abvesera nzakazi wace na aenda kabira kanomwe m’Nkulo wa Yoridani. Mudacita iye pyenepi, nyama yace yakhala yakuwanga na yaungumi!

Namani akomerwa kakamwe. Iye abwerera kwa Elixa mbampanga: ‘Cincino ndadziwadi kuti Mulungu wa m’Israyeli ndi Mulungu wandimomwene m’dziko yonsene yapantsi. Natenepa, ndaphata mwendo, kwatani muoni uyu unakupasani ine.’ Mbwenye Elixa atawira: ‘Nkhabe, sinadzautambira tayu.’ Elixa akhadziwa kuti mbukudakhala kwakudawika kwa iye kukwata muoni, thangwi akhali Yahova adawangisa Namani. Mbwenye nzakazi wa Elixa, Gehazi, akhafuna muoni kwa iye ene.

Natenepa, ipi ndipyo pidacita Gehazi. Mudamala kuenda Namani, Gehazi anthamangira. Gehazi alonga: ‘Elixa andituma towera ndikupangeni kuti asafuna ingasi ya miyoni yanu thangwi ya axamwali adamala kwene kufika kudzamuona.’ Mwandimomwene, uyu ukhali unthawatawa. Mbwenye Namani hadadziwa tayu kuti ukhali unthawatawa; natenepa apasa Gehazi pinthu pingasi.

Mudabwerera Gehazi ku nyumba, Elixa adziwa pidacita iye. Yahova akhadampanga. Natenepa iye alonga: ‘Nakuti wacita cinthu ici cakuipa, matanya a Namani anadzabwera kwa iwe.’ Ipi pyacitika m’nzidzi uneule ene!

Kodi tingakwanise kupfunzanji kwa pyonsene ipi? Cakutoma, tisafunika kukhala ninga kantsikana mbatilonga pya Yahova. Ipi pingakwanise kubweresa udidi kakamwe. Caciwiri, nee tisafunika kukhala a umbirimi ninga Namani pakutoma, mbwenye tisafunika kubvera anzakazi a Mulungu. Na cacitatu, nee tisafunika kulonga unthawatawa ninga mudacita Gehazi. Kodi ife nkhabe pfunza pizinji m’kuleri Bibilya?