TINI shiima beetto mayitanni nooro afootto? Yihowa masaalaanchi Elsairenna isi Yihowa kaaˈleennasi assinoha dancha coye manchote kultanni no. Mancho kayinni Isiraeelete manni wido ikkitinokki daafira, Yihoware diaffino. Tini shiima beetto manchote qae mayira martinoro hanni laˈno.

Tini mancho Sooriyu manni widooti. Ayiddaannise Niˈˈimaani yinanniho; isi Sooriyu wottaaddari roorrichchaati. Sooriyu manni tenne shiima Isiraeelete beetto qafade, Niˈˈimaani galtera soqqamaancho ikkitara abbino.

Niˈˈimaani xiigaho yinannihu bushu xiwani amadisi. Kuni xiwani biso nafa tattayisannoho. Konni daafira beetto Niˈˈimaani galtera, ‘Mootichchiˈya Isiraeelete gobbara heeˈrannohu Yihowa masaalaanchiwa mayi haˈralla. Xiigisinni hursannosina’ yite kultanni no. Gedensaannino manchote ayiddaannira tenne kullisi.

Niˈˈimaani xiwanisinni hurara lowo geeshsha hasiˈrino daafira, Isiraeelete gobba haˈrara kai. Hakkiira mariti, Elsai minira haˈri. Elsaino Niˈˈimaani Yordaanoosi Lagira lamala hige hayishshiˈranno gede kulasira soqqamaanchosi soyi. Konnira Niˈˈimaani lowo geeshsha hanqe, ‘Ninke gobbara noo lagga Isiraeelete nooha baalanka laga roortanno!’ yii. Tenne coyiˈrihu gedensaanni, agure haˈri.

Ikkollana soqqamaanosi giddonni mittu, ‘Mootichcha, Elsai roore ayirrannore assi yoommehero assatto. Hatto ikkina yiihente gede mayira hadhe dihayishshiˈratto?’ yiisi. Niˈˈimaanino soqqamaanchisi yiinore macciishshe, Yordaanoosi Lagira mare lamala hige waa lixe fuli. Hatto assita, bisisi hure keeraancho ikki!

Niˈˈimaanino lowo geeshsha hagiidhi. Elsaiwa galagale mare, ‘Isiraeelete gobbara noo Magani, uullate aana isi calla halaalaancho Magano ikkinota xa afoommo. Konni daafira, tenne abboommohe elto adhi’ yii. Elsai kayinni, ‘Deeˈni, diadheemmo’ yee qoli. Niˈˈimaani hursinohu Yihowa ikkino daafira, Elsai manchu abbinosi elto adha soˈro ikkitinota afino. Ikkollana Elsai soqqamaanchi Giyaazi kayinni elto umisira adhara hasiˈrino.

Konni daafira Giyaazi maa assiro afitto? Niˈˈimaani haˈri gedensaanni, iso hordofanni haˈri. Mare iilliti, ‘Elsai soyeennae dawoommo; abbittosi elto giddo gama xa dayino wosinira aara hasiˈrinota kuli yiinoe’ yii. Togo yaasi kayinni kaphphoho. Niˈˈimaani Giyaazi kaphphanni noota diafino; konni daafira gama elto uyisi.

Giyaazi minira daanno wote, Elsai isi assinore afe no. Yihowa balaxe kule kainosi. Konni daafira, ‘Konne busha coye assoottohura, Niˈˈimaani xiigi atera higanno’ yiisi. Hakkawotenni xiigu Giyaazira higi!

Tenne baala xaggenni ma ronseemmo? Umi xaggenni, shiima beetto assitunte gede Yihoware mannaho kula hasiissannonketa ronseemmo. Togo assanke lowo geeshsha danchate. Layinkitenni, Niˈˈimaani umi qara ikki gede naaxxa hasiissannonkekkita ronseemmo; roorenkanni Maganu soqqamaanora hajajama hasiissannonke. Sayikkitenni, Giyaazi kaphphi gede ninke kaphpha hasiissannonkekkita ronseemmo. Qullaawa Maxaafa nabbawatenni lowo roso diafiˈneemmo?