YU SABI san a yongu umapikin disi e taki? A e fruteri a misi sani fu Yehovah profeiti Elisa nanga den wondru di Yehovah e yepi Elisa fu du. A misi no sabi sani fu Yehovah, bika a no de wan Israelsma. Meki wi go luku fa na umapikin kon na a oso fu a misi.

A misi na wan uma fu Siriakondre. En masra di nen Naman, na a edeman fu a legre fu Siriakondre. Den Siriasma ben kisi a yongu Israel umapikin disi èn den ben tyari en go na Naman wefi fu a de en futuboi.

Naman abi wan takru siki di den e kari gwasi. A siki disi kan meki taki son pisi fu wan sma skin nyan gowe srefi. Fu dati ede na umapikin e taigi Naman wefi: ’Mi winsi taki mi meester ben man go na Yehovah profeiti na ini Israel. A ben o dresi a gwasi fu en.’ Bakaten a misi e fruteri en masra a sani disi.

Naman wani fu kon betre so te; fu dati ede a e bosroiti fu go na Israel. Te a kon drape, a e go na a oso fu Elisa. Elisa e meki en futuboi go na dorosei fu taigi Naman fu go wasi en skin seibi tron na ini Yordanliba. Disi e meki Naman ati e bron srefisrefi èn a e taki: ’Den liba na a kondre fu mi de moro betre leki ala den liba na Israel.’ Baka te Naman e taki den wortu disi, dan a e hari gowe.

Ma wan fu en futuboi e taigi en: ’Mi masra, efu Elisa ben taigi yu fu du wan muilek sani, dan yu ben sa du en. Now, fu san ede yu no kan go wasi nomo, soleki fa a ben taki?’ Naman e arki en futuboi, a e go dukrun seibi tron na ini Yordanliba. Te a e du disi, dan en skin e kon nyun èn gosontu baka!

Naman e prisiri srefisrefi. A e drai go na Elisa èn e taigi en: ’Now mi sabi seiker taki a Gado fu Israel na a wan-enkri tru Gado na heri grontapu. Fu dati ede, grantangi, teki a presenti disi fu mi.’ Ma Elisa e taki: ’Nôno, mi no sa teki en.’ Elisa sabi taki a ben sa de fowtu fu teki a presenti, bika na Yehovah ben dresi Naman. Ma Elisa futuboi Gehasi wani a presenti gi ensrefi.

Fu dati ede disi na san Gehasi e du: Baka di Naman gowe, dan Gehasi e lon go miti en. ’Elisa seni mi fu taigi yu, taki toku a ben sa wani wan tu sani fu a presenti fu yu fu gi mati di kon luku en dyonsrode’, Gehasi e taki. A no de fu taki, dati disi na wan lei. Ma Naman no sabi taki na wan lei; fu dati ede a e gi Gehasi wan tu fu den sani.

Te Gehasi e drai kon na oso, dan Elisa sabi kaba san a du. Yehovah fruteri en dati. Fu dati ede a e taki: ’Fu di yu ben du a takru sani disi, meki a gwasi fu Naman sa kon na yu tapu.’ Dati e pasa wantewante!

San wi kan leri fu ala den tori disi? Na a fosi presi, taki wi musu taki fu Yehovah neleki a yongu umapikin. Dati kan du furu bun. Na a di fu tu presi, taki wi no musu abi bigimemre, soleki Naman ben abi disi biginbigin, ma wi musu gi yesi na den futuboi fu Gado. Na a di fu dri presi, taki wi no musu lei leki Gehasi. Wi kan leri furu sani te wi e leisi Bijbel, a no so?