LÁ NATAYÁÁ ndiéjunʼ eʼthí dxáʼgú bugi̱ ráʼ. Naʼthúu̱n náná ga̱jma̱a̱ numuu gaʼyee ndrígóo Jeobá bi̱ nagumbiʼyuu Eliseo, ga̱jma̱a̱ eʼwááʼ dí mitsaan rí Jeobá embáyuu maʼni. Náná bugi̱ na̱nguá ejmañuu ga̱jma̱a̱ numuu Jeobá numuu rí na̱nguá ni̱ndxu̱u̱ mbáa aʼgú israelita. Ikha jngó, guʼyáá náa numuu rí dxáʼgú lájuíin xtáa náa goʼwóo náná bugi̱.

Náná bugi̱ na̱ʼkha̱ náa xuajin Siria. Ajmbio̱o̱ náná nagumbiʼyuu Naamán, xa̱bu̱ bi̱ kayá edxu̱u̱ náa soldados bi̱ kuwa náa xuajin Siria. Xa̱bu̱ sirio nirtuwiin dxáʼgú israelita bugi̱, rí xúgi̱ ikhaa xtáa rañajunʼ náa a̱ʼgiu̱u̱ Naamán.

Naamán gíʼdoo mbá nandii dí ra̱májánʼ kayuʼ rí nagumbiʼyuu lepra. Nandii rígi̱ naʼni rí miga rígú xuyuʼ mbáa. Rígi̱ ñajunʼ rí xtáa raʼthí dxáʼgú: ‹Á mu tátá náa xtáá rañejunʼ naʼngo̱o̱ na̱jkha̱ náa xa̱bu̱ gaʼyee ndrígóo Jeobá bi̱ xtáa náa Israel, ikhaa maʼni thanuu lepra rí gíʼdoo›. Nda̱wa̱á najuiʼtháán ajmbio̱o̱ náná.

Naamán nandoo maʼni̱i̱; ikha jngó naʼthí maʼga̱ náa xuajin Israel. Índo̱ na̱jkha̱nú ikhí, na̱jkha̱ náa goʼwóo Eliseo. Eliseo naʼni rí magajnúu xa̱bu̱ bi̱ nañejunʼ náa ikhaa ga̱jma̱a̱ maʼthúu̱n Naamán rí muwan mbá juwan nutu náa mañu Jordán. Naamán nakiʼnáa wéñuʼ, ga̱jma̱a̱ naʼthí: ‹¡Mañu dí rígá náa xuajñuʼ itháan májánʼ ki xóo i̱ʼwáʼ mañu dí rígá náa Israel!›. Índo̱ guámbóo raʼthí rígi̱, ikhú najkha̱a̱.

Mú mbáa bi̱ nañejunʼ náa ikhaa naʼthúu̱n: ‹Tátá á mu Eliseo gáʼtháanʼ matani̱ mbá dí mingíjyúu, matani̱. Náa numuu rí na̱nguá ena, xóo má niʼthí ikhaa xá.› Naamán naʼdxun rí naʼthí xa̱bu̱ bi̱ nañejunʼ náa ikhaa ga̱jma̱a̱ najngúun náa mañu Jordán mbá juwan nutu. ¡Índo̱ naʼni rígi̱, xuyuʼ naʼni̱i̱la ma̱ngaa nánguá gíʼdoo nandii!

Naamán nadxuu wéñuʼ. Natanga̱a̱ náa Eliseo ga̱jma̱a̱ naʼthúu̱n: ‹Rí xúgi̱ nda̱yo̱o̱ gajkhun rí Dios ndrígóo Israel mbáwíi xtáa náa xúgíʼ tsu̱du̱u̱ ku̱ba̱ʼ. Ikha jngó, atani péñu, atrigú regalo rígi̱’›. Mú Eliseo naʼthí: ‹Na̱nguá, na̱nguá xú magruigu regalo›. Eliseo ndaʼyoo dí ra̱májánʼ gáʼni á mu nagruigú regalo, numuu rí ikhaa ndaʼyoo rí Jeobá ñajunʼ bi̱ niʼni thanuu Naamán. Mú Guejazi bi̱ nañejunʼ ga̱jma̱a̱ Eliseo nandoo magiʼdoo regalo.

Ikha jngó naʼni rígi̱. Nda̱wa̱á índo̱ Naamán na̱jkha̱a̱, Guejazi nagáyúu mu maxkamaa. Ikhaa naʼthúu̱n: ‹Eliseo nikuʼmún matha̱nʼ rí nandoo tikhuu regalo ndrígáʼ mu maxnún tikhun xa̱bu̱ bi̱ ndiʼkhún niguwáʼ gúyaa›. Rígi̱ ñajunʼ phú minduwaʼ. Mú Naamán na̱nguá eʼyoo; ikha jngó naxnúu Guejazi tikhuu regalo.

Eliseo ndaʼyoo má rí niʼni Guejazi índo̱ ikhaa natanga̱a̱. Jeobá má niʼthúu̱n. Ikha jngó naʼthí: ‹Numuu rí nitani̱ dí ra̱májánʼ, lepra ndrígóo Naamán maraʼdáá ikháánʼ›. ¡Nacha̱ má erígá xúʼko̱ kaʼnii!

Ndiéjunʼ gándoo gajmañulú xúgíʼ dí nirígá rígi̱ rá. Ginii, gíʼmaa manindxulúʼ xóo dxáʼgú bugi̱ ga̱jma̱a̱ muʼthá ga̱jma̱a̱ numuu Jeobá. Rígi̱ ma̱ndoo maʼni rí májánʼ wéñuʼ. Rí maʼni a̱jma̱, ragíʼmaa manindxulú xóo mbáa xa̱bu̱ bi̱ naʼnimbamínáʼ xóo má niʼni Naamán nákha ginii, gíʼmaa muʼnimbulúʼ rí ethi xa̱bi̱i̱ Jeobá. Rí maʼni ajtsú, ragíʼmaa muʼninduwaʼ xóo Guejazi. Lá ragájkhun rí ma̱ndoo majmañulúʼ itháan ga̱jma̱a̱ numuu Biblia ráʼ.