¿KATSIYA wix tuku lichuwinama uma tsumat? Litachuwinama uma puskat xlakata Eliseo xpalakachuwina Jehová, chu la Jehová makgtayay Eliseo natlaway katuwa tuku lu xatlan nilay tamakanajlay. Uma puskat nitu katsiy xlakata Jehová xlakata ni li Israel. Pero kaʼakxilhwi tuku xlakata uma tsumat anta wi kxchik uma puskat.

Uma puskat xalak Siria. Chu xchixku uma puskat wanikan Naamán, wa xapuxku soldados li Siria. Chu li Siria kitiyakgonit uma tsumat li Israel chu uku xlakskujni xpuskat Naamán.

Naamán kgalhiy lipekua tajatat wanikan lepra. Uma tajatat tlaway pi laktsu laktsu kataktalh xtiyatliwa chatum kristiano. Chu wa uma tuku kilhwama uma tsumat: Komo kimalana xlakgamputulh xpalakachuwina Jehová anta kʼIsrael, xmapaksaka chu nialh xkgalhilh lepra. Alistalh makatsinika xchixku uma puskat wantuku xwanit uma tsumat.

Naamán paksputun, wa xlakata lakapastakli naʼan kʼIsrael. Akxni chalh kʼIsrael, alh kxchik Eliseo. Eliseo wanilh kskujni pi kataxtulh chu kawanilh Naamán pi makgtujun kaʼalh takgtsinan kkgalhtuchokgo wanikan Jordán. Naamán snun lisitsilh chu wan: ¿Ni tlakg tlan kgalhtuchokgo nema wilakgolh kkinkachikin nixawa kgalhtuchokgo nema wilakgolh kʼIsrael? Chu akxni chuna wankgolh alh.

Pero kskujnin wanikgoy: Komo Eliseo xtiwanin natlawaya tuku tlakg tuwa, xtlawa. ¿Tuku xlakata ni pinputuna takgtsinana chuna la wanin? Naamán kakgalhakgaxmatli wantuku wanikgolh kskujnin chu makgtujun alh takgtsiy kJordán. ¡Akxni chuna tlawalh tatlanilh chu paksli!

Naamán lu paxuwalh, chu alh anta niku xwi Eliseo chu waniy: Chu uku liwana kkatsiy pi Dios xalak Israel wa xakstu Dios xlikalanka Katiyatni. Wa xlakata kakimakglhti uma tuku kmaskiwiman. Pero Eliseo wan: Ni, ni ktimakglhtin. Eliseo katsiy pi nitlan namakglhtinan tuku xmaskiwimaka xlakata wa Jehová tiku xmapaksanit Naamán. Pero Guehazí kskujni Eliseo xla makgamakglhtinanputun uma tamaskiwin.

Wa xlakata uma tuku tlawalh. Akxni Naamán xʼanitta, Guehazí kgosnalh chu mataxtukli. Chu wan: Eliseo kimalakgachama nakwaniyan pi lakaskin kaj aktsu tuku xmaskiwiputuna, xlakata nakamaxki tiku aku minkgolh lakgapaxialhnankgoy. Uma tuku wanilh kaj taʼakgsanin. Pero Naamán ni katsiy pi kaj akgsaninama wa xlakata maxkilh tuku skinilh.

Akxni Guehazí taspitli, Eliseo katsiya tuku tlawanit. Xlakata Jehová waninit. Chu wanilh: Xlakata tlawanita uma lanka nitlan xlepra Naamán wix nakgalhiya. ¡Chu tunkun chuna akgspulalh Guehazí!

¿Tuku kinkamasiyaniyan uma? Xliʼakgtum, nachuna kiliwanatkan la uma aktsu tsumat, nakalixakgatliyaw amakgapitsi xlakata Jehová. Komo chuna natlawayaw, lu tlan nakitaxtuniy amakgapitsin. Xliʼakgtiy, ni tlanka namakgkatsiyaw la pulana xwanit Naamán, wata nakakgalhakgaxmatniyaw xlakskujni Jehová. Xliʼakgtutu, ni naʼakgsaninanaw la tlawalh Guehazí. ¿Nixlikana pi lu lhuwa tuku kinkamasiyanikanan kBiblia?