YU SAVE dispela liklik meri i tok wanem? Em i tokim dispela meri long profet bilong Jehova, em Elisa, na long ol gutpela samting Jehova i helpim Elisa long mekim. Dispela meri i no save long Jehova, long wanem, em i no meri Israel. Orait, nau yumi ken stori bilong wanem liklik meri hia i stap long haus bilong dispela meri.

Meri hia em i bilong Siria. Man bilong em i namba wan ofisa bilong ami bilong Siria, nem bilong em Naman. Ol Siria i holim dispela liklik meri Israel, na kisim em i kam olsem wokmeri bilong meri bilong Naman.

Naman i gat wanpela sik nogut ol i kolim lepra. Dispela sik inap mekim sampela hap skin bilong man i lus na pundaun. Olsem na liklik meri i tokim meri bilong Naman: ‘I gutpela sapos bosman bilong mi i go long profet bilong Jehova long Israel. Em inap oraitim sik lepra bilong em.’ Bihain ol i stori long dispela samting long Naman.

Naman i gat laik tru long kamap orait gen, olsem na em i go long Israel. Taim em i go kamap, em i go long haus bilong Elisa. Elisa i salim wokboi bilong em i go tokim Naman long waswas 7-pela taim long wara Jordan. Naman i kros nogut tru long dispela, na em i tok: ‘Ol wara long ples i winim olgeta wara bilong Israel!’ Naman i tok olsem, na em i go.

Tasol wanpela wokboi bilong em i tok: ‘Bikman, sapos Elisa i bin tokim yu long mekim samting i hatwok long mekim, bai yu mekim, a? Orait, olsem wanem na yu no inap bihainim tok bilong em na waswas long dispela wara?’ Naman i harim tok bilong wokboi bilong em na i go waswas 7-pela taim long wara Jordan. Taim em i mekim olsem, skin bilong em i kamap gutpela na strong gen!

Naman i amamas tru. Em i go bek long Elisa na tokim em: ‘Nau mi save, God bilong Israel em i God tru bilong olgeta hap. Olsem na plis, kisim dispela presen bilong mi.’ Tasol Elisa i tok: ‘Nogat, mi no inap kisim wanpela samting.’ Elisa i save olsem i no stret long em i kisim dispela presen, long wanem, Jehova yet i bin oraitim Naman. Tasol wokman bilong Elisa, em Gehasi, em i laik kisim dispela presen.

Olsem na Gehasi i mekim olsem: Taim Naman i lusim ol na i go, Gehasi i ran bihainim em. Gehasi i tok: ‘Elisa i salim mi i kam bilong tokim yu olsem em i laikim sampela presen bilong givim long sampela pren em ol i kam nau tasol.’ Gehasi i giaman. Tasol Naman i no save olsem Gehasi i giaman, olsem na em i givim sampela samting long Gehasi.

Taim Gehasi i go bek long haus, Elisa i save long samting em i bin mekim. Jehova i bin tokim em. Olsem na em i tok: ‘Yu mekim pasin nogut, olsem na sik lepra bilong Naman bai kamap long yu.’ Na wantu sik lepra i kamap long Gehasi!

Dispela stori inap lainim yumi long wanem samting? Namba wan: Yumi mas bihainim pasin bilong dispela liklik meri na tokim ol man long Jehova. Dispela inap kamapim planti gutpela samting. Namba tu: Yumi no ken mekim pasin antap olsem Naman i bin mekim pastaim, tasol yumi mas bihainim tok bilong ol wokman bilong God. Na namba tri: Yumi no ken mekim tok giaman olsem Gehasi i bin mekim. Yumi inap lainim planti samting taim yumi ritim Baibel, a?