NOMANYA kiki akaisiki ako eki karukugamba? Nikagambira omukazi ogu hali omurangi wa Yahwe arukumanywa nka Erisa, hamu n’ebyamahano Yahwe akaba namukonyera kukora. Omukazi ogu akaba atarukumanya ebirukukwata hali Yahwe habwokuba akaba atali Muisareri. Katurole ensonga habwaki akaisiki ako kakaba kali omunju y’omukazi ogu.

Mugole we akaba ali Mwaramu. Iba akaba nuwe Naamani, engabwa ihe ly’Aramu. Abaramu bakaba batwaire akaisiki k’Akaisareri bakaletera mukazi wa Naamani okuba mukozi we.

Naamani akaba aine oburwaire bubi muno oburukwetwa ebigenge. Oburwaire bunu nubusobora kuleetera ebimu ha bicweka by’omubiri gw’omuntu kucwekaho. Kinu nikyo omwisiki ogu arukugambira mukazi wa Naamani: ‘Kukaba mukama wange agenda hali omurangi wa Yahwe omu Isareri, yakumukirize ebigenge bye.’ Hanyuma nawe akabigambira iba.

Naamani akaba nagonza muno kukizibwa. Nahabwekyo acwamu kugenda omu Isareri. Obu yahikireyo, agendera kimu hanju ya Erisa. Erisa atuma omuhereza we kugambira Naamani ngu agende ayoge omu Kisaru kya Yorudani emirundi musanju. Kinu kibihiza muno Naamani, kandi agamba ati: ‘Ebisaru byaitu byona nibikira binu eby’Omuisareri!’ Obu yamazire kugamba ebi, acwamu kagarukayo.

Baitu omu h’abairu be amugambira ati: ‘Waitu, kakuba Erisa akuragiire kukora ekintu kyona ekigumire, iwe wakukikozire. Hati habwaki otagenda okooga, nkoku akugambiire?’ Naamani akahuliriza omwiru we, yagenda yayeyibika omu Kisaru kya Yorudani emirundi musanju. Obu yakikozire, omubiri gwe gukakira n’okusemera!

Naamani asemererwa muno. Agaruka hali Erisa, n’okumugambira ati: ‘Dora hati bunu manyire nti Ruhanga ow’omu Isareri nuwe wenka Ruhanga ow’amananu omu nsi yoona. Nkwesengerize, ikiriza okutwara ekisembo ky’omwiru wawe.’ Erisa agarukamu ati: ‘Nangwa, tinsobora kukikora.’ Erisa akamanya ngu kiri kibi kutwara ekisembo, habwokuba Yahwe nuwe akaba akirize Naamani. Baitu Gehazi omwiru wa Erisa akaba nakyegondeza.

Kinu nikyo Gehazi yakozire. Naamani obu yamazire kugenda, Gehazi akakurata Naamani yamugambira ati: ‘Erisa antumire ngu nayenda ekisembo ekyo habw’abagenyi be abamazire kwija.’ Baitu binu byona bikaba bisuba. Naamani akaba atarukumanya ngu bisuba; nukwo yaha Gehazi ebimu ha bintu.

Gehazi obu yagarukire omuka, Erisa akamanya eki akaba akozire. Yahwe akaba amugambiire. Nukwo kumugambira ati: ‘Habwokuba okozire ekintu ekibi kiti, ebigenge bya Naamani biraikaraga haliiwe.’ Nukwo kyabaho ahonaho!

Binu byona nibitwegesa ki? Ekyokubanza, twine kusisana akaisiki kanu tugambe n’abantu hali Yahwe. Nikisobora kurugwamu ebirungi bingi. Ekyakabiri, titwine kuba ab’emyehembo nka Naamani nkoku yabaire okubanza. Twine okuhurra abahereza ba Ruhanga. Kandi ekyakasatu, titwine kubiha ebisuba nka Gehazi oku yakozire. Titurukusobora kwega bingi muno kuruga mu kusoma Baibuli?