OVE hẽ wa kũlĩha eci kafeko u a kasi loku popia? Eye o kasi loku sapuila ukãi u eci catiamẽla ku Elisia uprofeto wa Yehova. O kasi loku lombololavo ovina Yehova a kuatisa Elisia oku linga. Ukãi waco ka kũlĩhile cimue catiamẽla ku Yehova momo ka kaile u Isareli. Tu konomuisi esunga lieci kafeko u a kalela konjo yukãi waco.

Ukãi waco wo kofeka yo Suria. Ulume waye Namana wa kala kesongo kolohoka via va Suria. Olohoka via va Suria ovio viambatele kafeko u u Isareli. Noke wa tualiwa kukãi wa Namana oco a kala upika waye.

Namana wa kala luvei umue ũvi u tukuiwa hati, ovilundu. Uvei waco u pondola oku nyõla etimba liomunu. Eli olio esunga lieci kafeko u a kasilili ndeti oku popia lukãi wa Namana. Eye wa vangula laye hati: ‘Nda cime cange wa endele kuprofeto wa Yehova ko Isareli, nda hise. Eye nda wa sakula uvei waye.’ Noke ondaka yaco va yi sapuila ku Namana.

Namana wa yonguile muẽle oku sakuiwa. Omo liaco, wa enda toke ko Isareli. Eci a pitila ko Isareli wa enda konjo ya Elisia. Elisia wa tuma akuenje vaye oku sapuila Namana oco a ende Volui Yordão oku lisukulamo olonjanja epanduvali. Namana wa temẽle calua kuenje wa popia hati: ‘Olondui nda sia kofeka yange via velapo olondui via va Isareli.’ Noke lioku popia olondaka evi wa enda.

Pole umue pokati kakuenje vaye wa popia laye hati: ‘Acime cange, nda Elisia wa ku sapuilile oku linga ocina cimue ca tĩla, nda wa ci linga. Anga hẽ kaliye ocitokoka omo a ku sapuila hati, ka lisukule?’ Namana wa pokola kondaka yukuenje waye. Kuenje wa liyaveka olonjanja epanduvali Volui Yordão. Eci amãla oku lisukula, ositu yaye ya yela ciwa kuenje wa kaya.

Namana weya oku sanjuka calua. Noke wa tiukila ku Elisia loku popia hati: ‘Kaliye nda limbuka okuti, kilu lieve liosi ka kuli Suku, te lika ko Isareli. Kaliye hu pinga, tambula ombanjaile eyi kokuange.’ Elisia wa kumbulula hati: ‘Sio, si tambula ombanjaile yaco.’ Elisia wa kũlĩhihe okuti ka ca sungulukile oku tambula ombanjaile yaco. Momo Yehova eye wa sakula uvei wa Namana. Pole ukuenje waye Gehasi, wa yonguile oku tambula ombanjaile yaco.

Gehasi wa seteka muẽle oku ci linga. Eci Elisia a tunda, Gehasi wa tiukila oku ka tambula ombanjaile yaco kokuaye. Eci a pitila ku Namana wa popia laye hati: ‘Elisia wa numa kokuove oku pinga okambanjaile kamue, momo eye wa tambula akombe. Ondaka eyi ya kala ño uhembi. Pole omo okuti Namana ka ci kũlĩhile, eye wa eca muẽle ovina vimue ku Gehasi.

Eci Gehasi a tiukila konjo yaye, Elisia wa limbuka ovina eye a linga. Yehova wo sapuila ovina viaco. Omo liaco, wa popia laye hati: ‘Omo liovilinga viove vĩvi, ovilundu via Namana vi tiukila kokuove.’ Haico muẽle ca lingiwa!

Nye tu pondola oku lilongisa kulandu owu? Catete, tu sukila oku kuama ongangu ya kafeko aka yoku vangula eci catiamẽla ku Yehova. Momo oku ci linga ci kuatisa cocili. Cavali ceci okuti, Namana kefetikilo wa lekisa epela. Omo liaco, tu sukila oku pokola komanu va Yehova. Catatu tu sukila oku yuvula uhembi oco ka tu ka kuami ongangu ya Gehasi. Poku tanga Embimbiliya tu pondola vali oku lilongisa ovina vialua.

2 Olosoma 5:1-27.