MAARAM ka ba kon ano an ginsisiring hini nga daragita? Ginsusumatan niya ini nga babaye mahitungod han propeta ni Jehova nga hi Eliseo, ngan han urusahon nga mga butang nga nahihimo ni Eliseo pinaagi han bulig ni Jehova. Diri kilala hini nga babaye hi Jehova tungod kay diri hiya Israelita. Aton kitaon kon kay ano nga ini nga daragita aada ha balay hini nga babaye.

Siryahanon ini nga babaye. An iya bana amo hi Naaman, an lider han kasundalohan han Sirya. Ginbihag han Siryahanon nga kasundalohan ini nga Israelita nga daragita, ngan gindara hiya ha asawa ni Naaman basi magin surugoon.

Hi Naaman may-ada makangingirhat nga sakit nga tinatawag nga sanla. Tungod hini nga sakit mahimo pa ngani madunot an panit ngan unod han tawo. Salit nagsiring ini nga daragita ha asawa ni Naaman: ‘Hinaot makakadto an akon agaron ha propeta ni Jehova ha Israel. Matatambal niya an sanla han akon agaron.’ Katapos, iginsumat ini ha bana han babaye.

Karuyag gud ni Naaman nga matambal hiya; salit nagdesisyon hiya nga kumadto ha Israel. Pag-abot didto, kinadto hiya ha balay ni Eliseo. Ginsugo ni Eliseo an iya kabulig nga sumatan hi Naaman nga kumarigo ha Salog Jordan hin pito ka beses. Tungod hini nasina gud hi Naaman, ngan nagsiring: ‘Mas maopay an amon mga salog kay ha ngatanan nga salog ha Israel!’ Katapos niya magsiring hini, linakat hiya.

Kondi, usa han mga surugoon ni Naaman an nagsiring ha iya: ‘Ginoo, kon makuri an ginpabuhat ha imo ni Eliseo, bubuhaton mo ito. Kay ano nga diri ka na la kumarigo, sugad han iya ginsiring?’ Namati hi Naaman ha iya surugoon, ngan kinadto hiya ngan linurop ha Salog Jordan hin pito ka beses. Han ginbuhat niya ini, natambal hiya ngan naghamis an iya panit!

Nalipay gud hi Naaman. Binalik hiya kan Eliseo ngan nagsiring: ‘Yana maaram na ako nga an Dios han Israel amo la an matuod nga Dios ha bug-os nga tuna. Salit, alayon karawata ini nga akon regalo.’ Kondi hi Eliseo binaton: ‘Diri, diri ko ito kakarawaton.’ Maaram hi Eliseo nga sayop kon karawaton niya ito nga regalo tungod kay hi Jehova an nagtambal kan Naaman. Kondi karuyag han kabulig ni Eliseo nga hi Gehasi nga iyahon an regalo.

Salit ini an ginbuhat ni Gehasi. Pagbaya ni Naaman, ginlanat hiya ni Gehasi. ‘Ginsugo ako ni Eliseo basi sumatan ka nga karuyag niya an pipira han imo regalo para ha iya kasangkayan nga inabot pa la,’ siring ni Gehasi. Syempre, buwa ito. Kondi diri maaram hi Naaman nga buwa ito; salit iginhatag niya kan Gehasi an pipira han mga regalo.

Han binalik hi Gehasi, maaram na hi Eliseo han iya ginbuhat. Ginsumatan hiya ni Jehova. Salit hi Eliseo nagsiring: ‘Tungod kay ginbuhat mo ini nga maraot, an sanla ni Naaman mahingangada ha imo.’ Ngan nagin sanlahon dayon hi Gehasi!

Ano nga leksyon an aton mahibabaroan tikang hini? Siyahan, sadang kita mag-istorya mahitungod kan Jehova pariho han ginbuhat han daragita. Daku gud an kapulsanan hito. Ikaduha, diri kita magin hambog pariho kan Naaman ha tinikangan, lugod kinahanglan sugton naton an mga surugoon han Dios. Ngan ikatulo, diri kita magbuwa sugad han ginbuhat ni Gehasi. Oo, damu an aton nahibabaroan tikang ha pagbasa han Biblia, diri ba?