Tantara 69

Tsaiky Man̈angy Nan̈ampy Sefonany

MBA hainao raha koran̈in’ny tsaiky man̈angy io? Izy mikoran̈a amy man̈angy io mikasiky Elisa mpaminan̈in’i Jehovah, ndreky fahagagan̈a jiaby nataon’Elisa. Man̈angy io tsy mahay raha mikasiky Jehovah foeky, fôtony izy tsy Israelita. Atsika iziô hizaha nan̈ino tsaiky io nipetraka tamy man̈angy io.

Man̈angy io Syrianin̈y. Vadin’ny man̈angy io sefon’ny maramila syrianin̈y. Namàna an̈arany. Tsaiky man̈angy io nindesin’ny maramila syrianin̈y, atao ampiasan’ny vadin’i Namàna.

Nisy aretin̈y ratsy navoa Namàna. Izy boka. Izikoa olo araiky boka, nôfotronany sasany mapoaka. Ke volan̈in’ny tsaiky man̈angy io tamy vadin’i Namàna: ‘Mba tiako eky izikoa sefonakahy mandeha amy mpaminan̈in’i Jehovah an’Israely an̈y. Izy koa man̈ano zen̈y, janga edy.’ Tafaran’izin̈y, izy nikoran̈a zen̈y tamy Namàna foeky.

Namàna ti ho janga, ke izy nandeha tan’Israely tan̈y. Izy koa fa navy tan̈y, izy nandeha tamy tran̈on’Elisa. Elisa nan̈iraka ampiasanany hivolan̈a amy Namàna hijibiky impito amy Ten̈aranon’i Jordana. Namàna koa fa naharen̈y zen̈y, neloko. Volan̈iny: ‘Ten̈arano aminay an̈y tsaratsaran’ny ten̈aranon’Israely!’ Namàna baka tiô lôso.

Nisy ampiasanany araiky nivolan̈a kara’ty taminany: ‘Ah tômpoko anao, izikoa raha sarotro nirahan’Elisa nataonao, anao nan̈ano edy. Ke nan̈ino anao tsy miseky amy rano io, karaha nivolan̈iny in̈y?’ Naraihan’i Namàna volan̈an’ampiasanany zen̈y, ke izy lôso tamy Ten̈aranon’i Jordana tan̈y. Izy koa fa nijibiky impito tao, janga!

Namàna ravoravo be zay. Izy nimpody tamin’Elisa, nivolan̈a kara’ty: ‘Iziôty zaho vo mahay fa tsisy zan̈ahary miran̈a Zan̈aharin’Israely amy tany jiaby. Ty misy kadô hamiako anao.’ Nambaran’Elisa: ‘Tàna ninao fo izio.’ Hain’Elisa fa tsy mety mangala kadô io, fôtony tsy izy nampajanga Namàna fa Jehovah. Kanefa Gehazy, ampiasan’Elisa, nan̈iry mare hahazo kadô io.

Ty raha nataon’i Gehazy. Namàna koa fa lôso lavidavitry, Gehazy nan̈ian̈a. Volan̈iny: ‘Elisa nan̈iraka zaho hivolan̈a aminao fa alainy fo zen̈y sasany amy kadô seky namianao izy in̈y, amiany kamaradinany vo navy ao hamangy izy.’ Vandy areriky zen̈y. Namàna tsy nahay fa vandy raha zen̈y, ke namiany Gehazy sasany tamy raha io.

Gehazy koa fa nody tan-tran̈o, Elisa fa nahay raha nataony, fôtony nambaran’i Jehovah izy. Volan̈iny tamy Gehazy: ‘Fôtony anao nan̈ano raha ratsy, hifindra aminao aretin̈y Namàna in̈y. Ho boka anao.’ Niaraka tamy zen̈y izy boka!

Ino fianaran̈a azotsika boaka amy zen̈y? Voanalohany, karaha nataon’ny tsaiky hely io, atsika mila mikoran̈a raha mikasiky Jehovah amin’olo. Man̈ano ny tsara atsika izikoa man̈ano zen̈y. Faharoe, atsika tsy tôkony hiavon̈o karaha Namàna, fa han̈araka zay raha volan̈in’olon’i Jehovah amitsika. Farany, atsika tsy tôkony havandy miran̈a Gehazy. Izikoa atsika mamaky Baiboly, maro raha haitsika, tsy zen̈y?

2 Mpanjaka 5:1-27.