Ododo 70

Yona ki Rec Madit-ti

NEN kong laco ma i pii-ni. En tye i peko tutwal, pe kumeno? Rec ca-ni dong cok mwonyo en woko! In ingeyo anga ma laco man obedo? En nyinge Yona. Wanenu kong kit ma en odonyo kwede i peko madit tutwal-li.

Yona obedo lanebi pa Jehovah. Onongo pud pe okato kare malac i nge to pa Elica ci Jehovah owaco bot Yona ni: ‘Cit i boma madit me Nineve. Tim marac pa jo ma kunnu dong dwong tutwal, dok amito in ilok pire botgi.’

Ento Yona pe mito wot. Pi meno en odonyo i yeya ma tye ka cito dok tung kilong ki Nineve. Cwiny Jehovah pe yom i kom Yona pien tye ka ringo woko. Pi meno en okelo yamo madwong. Obedo rac ma yeya onongo mito lwiny woko. Lukwang yeya lworo omakogi matek, ci gulego kony ki bot lubangagi.

I ngeye Yona owaco botgi ni: ‘An aworo Jehovah, Lubanga ma ocweyo polo ki lobo. Dok an atye ka ringo woko ki i timo gin ma Jehovah otitta ni atim.’ Pi meno lukwang yeya gupenyo ni: ‘Watim ngo i komi me giko yamo madwong-ngi?’

Yona owaco ni: ‘Wubola woko i nam, ci nam bikwe woko doki.’ Lukwang yeya pe gimito timone, ento ka yamo omedde marac adada olo twal gubolo Yona woko. Cutcut yamo madwong-ngi ogik woko, ci nam okwe woko mot odoco.

Ka Yona tye ka lwiny piny i te pii, rec madit-ti omwonyo en woko. Ento en pe oto. En obedo i rec meno pi nino adek dyeceng ki dyewor. Yona cwinye owang ni pien pe ewinyo Jehovah dok pe ecito i Nineve. Pi meno in ingeyo ngo ma en otimo?

Yona olego kony ki bot Jehovah. Ci Jehovah omiyo rec-ci ongoko Yona woko i wi tura ka mutwo. I nge meno Yona ocito i Nineve. Man pe pwonyowa ni pire tek tutwal me tiyo gin mo keken ma Jehovah waco?

Yona buk me Baibul.