UMANKASKI uka jaqir uñtma. Jan walinwa uñjasi, ¡uka jachʼa chawllaw manqʼantani! ¿Khitïpachas uka jaqixa? Jonás satawa. Kunatsa ukham jan waltʼäwir purtʼasitayna uka tuqit yatxatañäni.

Jehová Diosan profetapaw Jonasaxa. Eliseo profetax jiwxän uka qhipatakwa Jehová Diosax Jonasar akham säna: ‘Nínive jachʼa markar sarma. Ukanxa jaqinakax jachʼa juchanakwa lurapxi, uka juchanakapat parlanim’ sasa.

Ukat Jonasax janiw sarañ munkänti. Ukhamasti yaqha tuqir sarir jachʼa boter sarxatasaw sarxäna. Jehová Diosatakix janiw walïkänti sarxatapaxa. Ukatwa jachʼa thaya sartayäna. Botex kʼumphintasirjamäxänwa. Uka bote apnaqirinakaxa wal sustjasipxäna, ukat sapa mayniw diosanakapar artʼasipxäna.

Ukatwa Jonasax arsüna: ‘Nayaw Uraqi, alaxpacha lurir Jehová Diosar yupaychta. Kuntï Jehová Diosax siskitu uk lurañat sarxaskta’ sasa. Ukat bote apnaqirinakax ¿kamachapxirismasa aka jachʼa thay tʼakurañapatakixa?’ sasaw jisktʼapxäna.

‘Qutar jaquntapxita, ukat qutax tʼakurxaniwa’ sänwa Jonasaxa. Bote apnaqirinakax janiw jaquntañ munapkänti, ukampis jukʼampwa thaytʼanïna, ukatwa Jonasarux qutar jaquntapxäna. Ukat ukaratpachaw qutasa thayasa tʼakurxäna.

Jonasax qutar jalantän ukhaxa mä jachʼa chawllaw manqʼantäna. Ukampis janiw jiwkänti. Kimsa uruy arumaw chawlla purakankänxa. Niniver sarañatakix kunatsa Jehová Diosar jan istʼkpachätxa sasaw Jonasax amtasïna. Ukhamaxa, ¿kuns lurpachäna uk yattati?

Jehova Diosatwa yanap mayisïna. Ukatsti, Jehová Diosaw Jonasaruxa waña uraqir jaqsuyxäna. Ukatxa, Jonasax iyaw sasaw Niniver saräna. Jehová Diosax kuntï maykistu ukxa phuqañasawa, ¿aka sarnaqäwix janit uk yatichkistu?