Maana 70nan

Jonasi ni jɛgɛ belebeleba

EKA cɛ lajɛ ji la. A bɛ i ko ale ka ko bɛɛ banna, bawo nin jɛgɛ bɛna a kunun. I b’a dɔn mɔgɔ min don wa? A tɔgɔ ko Jonasi. A y’a yɛrɛ sɔrɔ nin gɛlɛya la cogo min na, an k’o lajɛ ɲɔgɔn fɛ.

Jonasi ye Jehova ka kira dɔ ye. Kira Elise salen kɔfɛ, a ma mɛn, Jehova kumana Jonasi fɛ. A ko: ‘Taa Ninivɛ duguba kɔnɔ, bawo u ka juguya barika bonyara kosɛbɛ. Ne b’a fɛ i ka taa u ka juguya kuma fɔ u ye.’

Nka, Jonasi tun t’a fɛ ka taa. O kosɔn, a donna kurunba dɔ kɔnɔ min taara ka Ninivɛ to u kofɛ. Jonasi ye o min kɛ, o ma diya Jehova ye. O la sa, Jehova ye sanfiɲɛba dɔ wuli. O sanfiɲɛ juguyara fo kurun tun bɛ ɲini ka to ji la. Kurunbolilaw siranna kosɛbɛ. U kulela ka u ka alaw wele, walisa u ka alaw k’u dɛmɛ.

A laban na, Jonasi y’a fɔ u ye ko: ‘Ne bɛ Jehova de bato. Ale de ye Ala ye min ye sankolo ni dugukolo da. Jehova ko ne ka ci min kɛ, ne bɛ ka boli o ci de ɲɛ.’ O la, kurunbolilaw y’a ɲininka ko: ‘An ka mun kɛ i la walisa sanfiɲɛba ka jɔ?’

Jonasi ko: ‘Aw ka ne fili kɔgɔji la, a bɛna mada kokura.’ O mɔgɔw tun t’a fɛ k’o kɛ. Nka, ikomi sanfiɲɛ tun bɛ juguyara ka taa a fɛ, u labanna ka Jonasi fili kɔgɔji la. O yɔrɔnin bɛɛ la, sanfiɲɛ jɔra. Kɔgɔji fana madara kokura.

Jonasi tun bɛ ka jigin ji la minkɛ, jɛgɛ belebeleba dɔ y’a kunun. Nka Jonasi ma sa. A tora jɛgɛ kɔnɔbara la tile saba ani su saba. Jonasi nimisara kosɛbɛ, bawo a ma Jehova ka kuma mɛn ka taa Ninivɛ. I b’a dɔn a ye min kɛ wa?

Jonasi ye Jehova deli walisa a ka ale dɛmɛ. O la sa, Jehova y’a kɛ jɛgɛ ye Jonasi fɔɔnɔ kɔgɔjida la. O kɔfɛ sa, Jonasi taara Ninivɛ. Yala nin maana tɛ an kalan ko ni Jehova ko an ka fɛn dɔ kɛ, a nafa ka bon kosɛbɛ an ka o kɛ wa?

Bibulu kɔnɔ kitabu min tɔgɔ ye ko Jonasi.