TALA lunga au uli mu meya. Iye kali mu luyinda, ni ngwami? Tala yishi auze kanambe kumuminya! Lunga wacho te iya? Jina lienyi te Yona. Tutalenu chize iye anakalinjisa mu luyinda wacho.

Yona kapwile te umwe profeta wa Yehova. Chino chapwile ndambu kulutwe lia ufwe wa profeta Elisha, mba Yehova yamba kuli Yona ngwenyi: ‘Yako ku mbonge yinene ya Ninive. Ungulungulu wa atu jako hiwapwa unji chinji, nawa yami ngunazange hanga yena uye wambujole kuli ayo hakutwala ku yuma yino.’

Alioze Yona kakazangile kuya ko. Hohene iye yaya mu ulungu uze te kuushi kuya ku Ninive. Yehova kakazangile kuchina cha Yona. Hohene Yehova yatuma fuji. Fuji yacho yipwa yinene chinji, hi ulungu yiupwa mu kapalia wa kushimbama. Akwa kwendesa ulungu yevwa woma unji, nawa ayo yaputuka kukololoka kuli tuzambi two hanga aakwase.

Hi kusongo Yona yamba kuli atu jacho ngwenyi: ‘Yami nakuwayila Yehova, Zambi yoze unakalinga malilu ni hashi. Nawa yami ngunachina kulinga yuma yize Yehova angutumanga hanga ngulinge.’ Akwa kwendesa ulungu yamuhula ngwo: ‘Yika yetwe mutukulinga hanga fuji yihole?’

Yona yamba ngwenyi: ‘Ngumbilenu mu kalunga-lwiji, nawa kalunga-lwiji kumahola. Akwa kwendesa ulungu kakazangile kulinga chocho, alioze fuji yiyipwa yinji chinji, mba ayo yambila Yona mu kalunga-lwiji. Hi fuji yihola, mba kalunga-lwiji yalitwamina ufwatulo wenyi.

Muze Yona te anashimbama mu meya, umwe yishi munene yeza yamuminya. Alioze iye kakafwile. Yatwama matangwa atatu ni ufuku utatu mu jimo lia yishi. Yona kanakapwa ni yinyengo yinji mumu iye kanakehuka kuya ku Ninive kuze Yehova amutumine. Yena unanyingika yize iye anakalinga?

Yona yalemba kuli Yehova hanga amukwase. Hohene Yehova yatuma yishi hanga asaze Yona hashi homu. Kulutwe lia yino yuma mba Yona yaya mu Ninive. Yino yiso kutulongesa ngwo chili chilemu chinji kulinga yuma yize Yehova anatutuma?